ಅಟ್ಲಾಸ್ ಸೈಕಲ್, ದೀಪಾವಳಿ ಲಾಟರಿ, ಆಶಾ ಹೊಲಿಗೆ ಯಂತ್ರ, ಸ್ನೇಕ್ ಸೋಮಣ್ಣನ ಥ್ರಿಲ್ಲರ್ ಕಾದಂಬರಿ ಹೀಗೆ ಹಳೆಯ ಜಾಹೀರಾತು ಮಾದರಿಗಳನ್ನು ಇಟ್ಟುಕೊಂಡೇ ವಿಶಿಷ್ಟ ಪ್ರಮೋಶನ್ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಸುದ್ದಿ ಮಾಡುತ್ತಿದೆ ಜಯತೀರ್ಥ ನಿರ್ದೇಶನದ ಸಿನಿಮಾ ‘ಬೆಲ್ ಬಾಟಂ’. ಟಿ.ಕೆ. ದಯಾನಂದ ಈ ಚಿತ್ರಕ್ಕೆ ಕಥೆ ಬರೆದಿದ್ದಾರೆ. ಪತ್ತೆದಾರಿ ಕಥೆಯ ಎಳೆ ಹೊಂದಿರುವ ಈ ಸಿನಿಮಾ ಹಾಸ್ಯದ ರಸದೌತಣವನ್ನೂ ಬಡಿಸುವ ಸೂಚನೆಯನ್ನು ಟೀಸರ್ನಲ್ಲಿಯೇ ನೀಡಿದೆ. ‘ಏತಕೆ ಬೊಗಸೆ ತುಂಬ ಕನಸು ತುಂಬುವೆ’ ಎಂಬ ಹಾಡು ಈಗಾಗಲೇ ಕ್ರೇಜ್ ಹುಟ್ಟಿಸಿದೆ.
* ಇದನ್ನೂ ಓದಿ:ಬೆಲ್ ಬಾಟಂ: ಹಳೆ ಪ್ಯಾಂಟು; ಮೀಮ್ಸ್ ಮಸ್ತ್ ಉಂಟು
ಬೆಲ್ ಬಾಟಂ ಪ್ಯಾಂಟು ಹಾಕಿಕೊಂಡು ಎಡವಟ್ಟು ಡಿಟೆಕ್ಟೀವ್ ರೂಪದಲ್ಲಿ ರಿಷಬ್ ಶೆಟ್ಟಿ ನಟಿಸಿರುವ ಈ ಚಿತ್ರದಲ್ಲಿ ಸೈಕಲ್ ತುಳಿಯುವ ದೊಡ್ಡ ತುರುಬಿನ ಹುಡುಗಿಯಾಗಿ ಹರಿಪ್ರಿಯಾ ಕಾಣಿಸಿಕೊಂಡಿದ್ದಾರೆ. ಶೀರ್ಷಿಕೆಯೇ ಹೇಳುವ ಹಾಗೆ ‘ಬೆಲ್ ಬಾಟಂ’ ಪ್ಯಾಂಟುಗಳು ಕ್ರೇಜ್ ಹುಟ್ಟಿಸಿದ್ದ ದಿನದಲ್ಲಿ ನಡೆಯುವ ಸಿನಿಮಾ ಇದು. ಹಾಗಾಗಿ ಅದೇ ಕಾಲದಲ್ಲಿ ಚಾಲ್ತಿಯಲ್ಲಿದ್ದ ಜನಪ್ರಿಯ ಉತ್ಪನ್ನಗಳ ಜಾಹೀರಾತುಗಳನ್ನು ಈ ಚಿತ್ರದ ಪ್ರಮೋಷನ್ಗಾಗಿ ಬಳಸಿಕೊಳ್ಳಲಾಗಿದೆ. ಚಿತ್ರದ ತಾಂತ್ರಿಕ ವರ್ಗವನ್ನೂ ಅದೇ ಶೈಲಿಯಲ್ಲಿಯೇ ತಂಡ ಪರಿಚಯಿಸಿಕೊಡುತ್ತಿದೆ.
ಯೋಗರಾಜ್ ಭಟ್, ಶಿವಮಣಿ, ಪ್ರಮೋದ್ ಶೆಟ್ಟಿ, ಅಚ್ಯುತ್ ಕುಮಾರ್ ಸೇರಿದಂತೆ ಹಲವು ಘಟಾನುಘಟಿ ನಟರು ನಟಿಸಿರುವ ಈ ಸಿನಿಮಾ ಫೆ. 15ಕ್ಕೆ ತೆರೆಗೆ ಬರಲು ಸಜ್ಜಾಗಿದೆ. ಹಳೆಯ ಪ್ಯಾಂಟಿನ ಜತೆಗೆ ಹೊಸ ನಂಟನ್ನು ಬೆಸೆಯುವ ಪ್ರಯತ್ನದಂತೆ ಕಾಣಿಸುವ ಈ ಚಿತ್ರವನ್ನು ಪ್ರೇಕ್ಷಕರು ಹೇಗೆ ಸ್ವೀಕರಿಸುತ್ತಾರೋ ನೋಡಬೇಕು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.