‘ಚಾಶ್ನಿ’ ಅಂದರೆ ಸಕ್ಕರೆಯ ಸಿಹಿ ಪಾಕ. ಇದೇ ಈದ್ ಹಬ್ಬಕ್ಕೆ ಬಿಡುಗಡೆಯಾಗಲಿರುವ ‘ಭಾರತ್’ ಸಿನಿಮಾದ ಹಾಡಿನಲ್ಲೂ ‘ಚಾಶ್ನಿ’ ಅನ್ನುವ ಪದವಿದೆ. ಹೆಸರಿಗೆ ತಕ್ಕಂತೆ ‘ತೇರೆ ಇಶ್ಕ್ ಚಾಶ್ನಿ’ ಅನ್ನುವ ಸಾಲುಗಳುಳ್ಳ ಈ ಹಾಡು ಈಗಾಗಲೇ ಸಲ್ಲೂ–ಕತ್ರೀನಾ ಅಭಿಮಾನಿಗಳಲ್ಲಿ ಮನೆ ಮಾಡಿದೆ.
ಏಪ್ರಿಲ್ 30ರಂದು ಬಿಡುಗಡೆಯಾಗಿರುವ ‘ಚಾಶ್ನಿ’ ಹಾಡಿನ ಪ್ರೊಮೊ ‘ಭಾರತ್’ ಸಿನಿಮಾದ ಸ್ವಾದ ಹೆಚ್ಚಿಸುವಂತಿದೆ. ಸಲ್ಮಾನ್ ಅಭಿನಯದ ಬಹುನಿರೀಕ್ಷಿತ ಚಿತ್ರವಾಗಿರುವ ‘ಭಾರತ್’ ಈಗಾಗಲೇ ಪ್ರೇಕ್ಷಕರಲ್ಲಿ ಅಪಾರ ಕುತೂಹಲ ಹುಟ್ಟುಹಾಕಿದೆ.
ಈ ಹಿಂದೆ ದಿಶಾ ಪಟಾನಿ–ಸಲ್ಲೂ ಜತೆಗಿರುವ ಹಾಡನ್ನು ಚಿತ್ರತಂಡ ಬಿಡುಗಡೆ ಮಾಡಿತ್ತು. ಆ ಹಾಡಿನ ಜನಪ್ರಿಯತೆಯನ್ನೂ ಹಿಂದಿಕ್ಕುವ ಸೂಚನೆ ನೀಡಿರುವ ‘ಚಾಶ್ನಿ’ಯಲ್ಲಿ ಕತ್ರೀನಾ ಕೈಫ್ ಮೋಹಕವಾಗಿ ಕಾಣುತ್ತಾರೆ. ಸರೋವರದ ಮೇಲೆ ಶುಭ್ರ ಉಡುಪಿನಲ್ಲಿ ನಡೆದುಕೊಂಡು ಬರುವ ಕತ್ರೀನಾ, ಮತ್ತೊಂದು ದೃಶ್ಯದಲ್ಲಿ ಕಡುಹಸಿರು ಬಣ್ಣದ ಲೆಹೆಂಗಾದಲ್ಲಿ ಪ್ರೀತಿಯ ಹಸಿರು ಹೊನಲನ್ನೇ ಹರಿಸಿದ್ದಾರೆ. ಪ್ರೀತಿಯ ಅಮಲಿನಲ್ಲಿರುವ ಸಲ್ಮಾನ್ –ಕತ್ರೀನಾ ಜೋಡಿ ನೋಡುಗರ ಮನಸೂರೆಗೊಳ್ಳುವಂತಿದೆ.
‘ಚಾಶ್ನಿ’ ಹಾಡಿನ ಬಗ್ಗೆ ತಮ್ಮ ಟ್ವಿಟರ್ ಖಾತೆಯಲ್ಲಿ ಸಲ್ಲೂ ‘ಈ ಸಲದ ಈದ್ಗೆ ಪ್ರೀತಿಯ ಸಿಹಿ....’ ಅನ್ನು ಪ್ರೇಮದ ಒಕ್ಕಣೆಯನ್ನೂ ಬರೆದುಕೊಂಡಿರುವುದು ಅವರ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.