ಬೆಂಗಳೂರು: ಚಿತ್ರರಂಗದ ಕುರಿತ ನೆನಪುಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಸದಾ ಹಂಚಿಕೊಳ್ಳುವ ಜಗ್ಗೇಶ್ ಅವರು, ಇತ್ತೀಚೆಗೆ ರಾಜ್ ಅವರ ಕುರಿತ ನೆನಪೊಂದನ್ನು ಇನ್ಸ್ಟಾಗ್ರಾಂನಲ್ಲಿ ಬಿಚ್ಚಿಟ್ಟಿದ್ದಾರೆ.
ತೆಲುಗು ಚಿತ್ರರಂಗದ ದಿಗ್ಗಜ ನಾಗೇಶ್ವರ್ ರಾವ್, ಕನ್ನಡದ ಮೇರು ನಟ ಡಾ. ರಾಜ್ಕುಮಾರ್ ಅವರೊಂದಿಗೆ ಜಗ್ಗೇಶ್ ಇರುವ ಚಿತ್ರವೊಂದನ್ನು ಅವರ ಅಭಿಮಾನಿಯೊಬ್ಬರು ಸಾಮಾಜಿಕ ತಾಣದಲ್ಲಿ ಹಂಚಿಕೊಂಡಿದ್ದಾರೆ. ಅದನ್ನು ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿರುವ ಜಗ್ಗೇಶ್ ತಮ್ಮ ನೆನಪಿನಾಳಕ್ಕೆ ಜಾರಿದ್ದಾರೆ.
‘ಜಾಲತಾಣದ ಮಿತ್ರನೊಬ್ಬ ಹಂಚಿಕೊಂಡಿದ್ದ ನಾನು ನೋಡಿರದ ಚಿತ್ರ ಇದು. ಚಿತ್ರ ತುಂಬ ಸಂತೋಷ ನೀಡಿತು. ಇದು 1996/97 ಇರಬಹುದು ಎಂದು ಭಾವಿಸುವೆ. ಆದರೆ ಸರಿಯಾಗಿ ನೆನಪಿಲ್ಲ. ಆದರೆ, ಅಣ್ಣ (ರಾಜಕುಮಾರ್) ನನ್ನನ್ನು ನಾಗೇಶ್ವರ ರಾವ್ ರವರಿಗೆ ಪರಿಚಯಿಸಿದ ರೀತಿ ನೆನಪಿದೆ ‘ಧಣಿ, ಈತ ಜಗ್ಗೇಶ ಅಂತ. ಬಹಳ ಪ್ರತಿಭಾವಂತ ನಟ. ಜೊತೆಗೆ ನನ್ನ ಇಷ್ಟದ ಆಂಜನೇಯ ಎಂದುಬಿಟ್ಟರು. ಆಗ ನಾಗೇಶ್ವರ ರಾಯರು ಹೀಗೆ ಹಿರಿಯರ ಪ್ರೀತಿ ಗಳಿಸುವುದು ಒಂದು ತಪಸ್ಸು ಎಂದರು,’ ಎಂದು ಜಗ್ಗೇಶ್ ಹೇಳಿದ್ದಾರೆ.
‘ಇಂಥ ದಿಗ್ಗಜರ ನಡುವೆ ಬೆಳೆದ ಮಾಯಸಂದ್ರ ಪಕ್ಕದ ಸಣ್ಣಗ್ರಾಮದ ಹುಡುಗ ಎಂಥ ಅದೃಷ್ಟವಂತ ಅನ್ನಿಸಿತು. ಇಂಥ ಮಹನಿಯರ ಗುಣನಡತೆ ನನ್ನ ರಕ್ತದಲ್ಲಿ ಬೆರತಿದೆ. ಕೊನೆ ಉಸಿರಿನವರೆಗೆ ನನ್ನ ಗುಣವಾಗಿರುತ್ತದೆ,’ ಎಂದು ಅವರು ಬರೆದುಕೊಂಡಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.