ಹಲ್ಲೆ ನಡೆಸಿ ಖಾಸಗಿ ವಿಡಿಯೊ ‌ಚಿತ್ರೀಕರಿಸಿಲ್ಲ: ನಟ ಮಡೆನೂರು ಮನು ಹೇಳಿಕೆ

ಬೆಂಗಳೂರು: ತನ್ನ ವಿರುದ್ಧ ಅತ್ಯಾಚಾರ ಆರೋಪದ ಅಡಿ ದೂರು ನೀಡಿರುವ ಸಹ ನಟಿ ಐದು ವರ್ಷದ ಹಿಂದೆಯೇ ಪರಿಚಯವಾಗಿದ್ದರು. ಆಕೆಗೆ ಬಾಡಿಗೆ ಮನೆ ಹುಡುಕಿಕೊಡಲು ನೆರವು ನೀಡಿದ್ದು ನಿಜ. ಆದರೆ, ಆಕೆಯ ಮೇಲೆ ಯಾವುದೇ ರೀತಿಯಲ್ಲೂ ದೌರ್ಜನ್ಯ ಎಸಗಿಲ್ಲ ಎಂಬುದಾಗಿ ನಟ ಮಡೆನೂರು ಮನು ಅವರು ಪೊಲೀಸರ ವಿಚಾರಣೆ ವೇಳೆ ಹೇಳಿಕೆ ನೀಡಿದ್ದಾರೆ ಎಂದು ಗೊತ್ತಾಗಿದೆ. 

ಅತ್ಯಾಚಾರ ಆರೋಪದ ಅಡಿ ಮಡೆನೂರು ಮನು ಅವರನ್ನು ಅನ್ನಪೂರ್ಣೇಶ್ವರಿ ನಗರ ಠಾಣೆಯ ಪೊಲೀಸರು ಬಂಧಿಸಿ ಹೆಚ್ಚಿನ ವಿಚಾರಣೆಗಾಗಿ ತಮ್ಮ ಕಸ್ಟಡಿಗೆ ಪಡೆದುಕೊಂಡಿದ್ದರು. ಈ ವೇಳೆ ಆರೋಪಿಯ ಹೇಳಿಕೆಯನ್ನು ಪೊಲೀಸರು ದಾಖಲು ಮಾಡಿಕೊಂಡಿದ್ದಾರೆ. ಸದ್ಯ ಆರೋಪಿ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ನ್ಯಾಯಾಂಗ ಬಂಧನದಲ್ಲಿ ಇದ್ದಾರೆ.

‘ದೂರು ನೀಡಿರುವ ಮಹಿಳೆಯನ್ನು ಮದುವೆ ಆಗಿಲ್ಲ. ಅವರ ಆಪಾದನೆ ಸುಳ್ಳು. ಕಳೆದ ಮೇ 17ರಂದು ಬೆಂಗಳೂರಿನ ನಾಗರಬಾವಿಯಲ್ಲಿ ಭೇಟಿಯಾಗಿದ್ದು ನಿಜ. ಯಾವುದೇ ರೀತಿಯಾಗಿ ಹಲ್ಲೆ ಮಾಡಿ ಖಾಸಗಿ ವಿಡಿಯೊ ‌ಚಿತ್ರೀಕರಿಸಿಲ್ಲ’ ಎಂದು ಹೇಳಿಕೆ ನೀಡಿದ್ದಾರೆ.

‘ದೂರುದಾರೆ ಪರಿಚಯ ಆಗುವುದಕ್ಕೂ ಮುನ್ನವೇ ನನಗೆ ಮದುವೆ ಆಗಿತ್ತು. ಈ ವಿಚಾರವೂ ಆಕೆಗೂ ತಿಳಿದಿತ್ತು. ನನ್ನ ಕುಟುಂಬಸ್ಥರಿಗೂ ಆಕೆಯ ಪರಿಚಯವಿದೆ’ ಎಂದು ವಿಚಾರಣೆ ವೇಳೆ ಆರೋಪಿ ಹೇಳಿಕೆ ನೀಡಿದ್ದಾರೆ.