ರಾನಾ ದಗ್ಗುಬಾಟಿ-ಮಿಹಿಕಾ ಬಜಾಜ್ ಮದುವೆ ಮುಂದೂಡಿಕೆ?

ಮಿಹಿಕಾ ಬಜಾಜ್‌ ಜತೆಗೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದ 'ಬಾಹುಬಲಿ' ರಾನಾ ದಗ್ಗುಬಾಟಿ ಮದುವೆ ಮುಂದೂಡಿಕೆಯಾಗಿದೆ ಎಂದು ಹೈದರಾಬಾದ್‌ನ ಸ್ಥಳೀಯ ಪೋರ್ಟಲ್‌ಗಳು ವರದಿ ಮಾಡಿವೆ.

ತಮ್ಮ ಬಹುಕಾಲದ ಗೆಳತಿ ಮಿಹಿಕಾ ಬಜಾಜ್‌ ಜತೆಗಿನ ನಿಶ್ಚಿತಾರ್ಥದ ವಿವರವನ್ನು ರಾನಾ ಮೇ 21ರಂದು ಇನ್‌ಸ್ಟಾಗ್ರಾಂ ಪೋಸ್ಟ್‌ ಮೂಲಕ ಜಾಹೀರು ಮಾಡಿದ್ದರು. ಆಗಸ್ಟ್‌ 8ಕ್ಕೆ ಈ ಜೋಡಿಯ ಮದುವೆ ನಡೆಯಲಿದೆ ಎಂದು ಕುಟುಂಬದ ಮೂಲಗಳನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿದ್ದವು.

ಇದೀಗ ಕೊರೊನಾ ವೈರಸ್‌ ಪಿಡುಗು ಹೆಚ್ಚಾಗಿರುವ ಕಾರಣ ಅನಿವಾರ್ಯವಾಗಿ ಮದುವೆ ಮುಂದೂಡಲು ಎರಡೂ ಕುಟುಂಬಗಳು ನಿರ್ಧರಿಸಿವೆ. ರಾನಾ ದಗ್ಗುಬಾಟಿ ಅವರ ತಂದೆ ಸುರೇಶ್‌ ಬಾಬು ಮತ್ತು ಮಿಹಿಕಾ ಬಜಾಜ್‌ರ ತಾಯಿ ಬಂಟಿ ಹೊಸ ಮದುವೆ ದಿನಾಂಕದ ಹುಡುಕಾಟದಲ್ಲಿದ್ದಾರೆ ಎಂದು ಟಾಲಿವುಡ್‌ ಸಿನಿ ಜಾಲತಾಣಗಳು ವರದಿ ಮಾಡಿವೆ.