‘ಲಾಲ್‌ ಕಪ್ತಾನ್‌’ನಲ್ಲಿ ಸೋನಾಕ್ಷಿ
ಸೈಫ್‌ ಅಲಿ ಖಾನ್‌ನ ‘ಲಾಲ್‌ ಕಪ್ತಾನ್‌’ ಸಿನಿಮಾವು ಸೆಟ್ಟೇರಿದ ದಿನದಿಂದಲೂ ಒಂದಲ್ಲ ಒಂದು ಕಾರಣಗಳಿಂದ ಸುದ್ದಿಯಲ್ಲಿದೆ. ಈಗ ಈ ಸಿನಿಮಾದ ಪೋಸ್ಟರ್‌ನಲ್ಲಿ ನಟಿ ಸೋನಾಕ್ಷಿ ಸಿನ್ಹಾ ಹೊಸ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ.
ನವದೀಪ್‌ ಸಿಂಗ್‌ ಅವರ ‘ಲಾಲ್‌ ಕಪ್ತಾನ್‌’ ಸಿನಿಮಾದಲ್ಲಿ ವಿಶೇಷ ಪಾತ್ರದಲ್ಲಿ ಸೋನಾಕ್ಷಿ ಸಿನ್ಹಾ ನಟಿಸುತ್ತಿದ್ದಾರೆ. ‘ಕಲಂಕ್‌’, ‘ಖಾಂದನಿ ಶಫಾಖಾನ’, ‘ಮಿಷನ್‌ ಮಂಗಲ್‌’ ಸಿನಿಮಾದ ನಂತರ ಈ ವರ್ಷ ಸೋನಾಕ್ಷಿ ನಟಿಸಿರುವ ನಾಲ್ಕನೇ ಚಿತ್ರ ‘ಲಾಲ್‌ ಕಪ್ತಾನ್‌’. ಈ ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ಅವರು ನಟಿಸಿದ್ದಾರೆ. ಚಿತ್ರತಂಡ ಬಿಡುಗಡೆ ಮಾಡಿರುವ ಪೋಸ್ಟರ್‌ನಲ್ಲಿ ಕೆಂಪು ಅದ್ಧೂರಿ ಲೆಹೆಂಗಾ ತೊಟ್ಟಿರುವ ಅವರು ಮುಖವನ್ನು ಬರಿ ಕಣ್ಣು ಕಾಣುವಂತೆ ಪರದೆಯಿಂದ ಮುಚ್ಚಿಕೊಂಡಿದ್ದಾರೆ. ಇದು ಅವರ ಪಾತ್ರದ ಬಗ್ಗೆ ಕುತೂಹಲವನ್ನು ಹೆಚ್ಚು ಮಾಡಿದೆ.
‘ಮಿಷನ್‌ ಮಂಗಲ್‌’ ಸಿನಿಮಾದಲ್ಲಿ ವಿಜ್ಞಾನಿಯಾಗಿ ನಟಿಸಿದ್ದ ಹಾಗೂ‘ದಬಾಂಗ್‌ 3’ನಲ್ಲಿ ಗೃಹಿಣಿಯಾಗಿ ಅಭಿನಯಿಸುತ್ತಿರುವ ಅವರು ‘ಲಾಲ್‌ ಕಪ್ತಾನ್‌’ ಸಿನಿಮಾದಲ್ಲಿ ಹೊಸ ಅವತಾರದಲ್ಲಿ ಕಾಣಿಸಿದ್ದಾರೆ.‘ಇದು ಅತಿಥಿ ಪಾತ್ರವಾದರೂ, ಈ ಪಾತ್ರಕ್ಕೆ ಚಿತ್ರದಲ್ಲಿ ತುಂಬಾ ಪ್ರಾಮುಖ್ಯತೆ ಇದೆ. ಇದಕ್ಕೆ ಜನಪ್ರಿಯ ನಟಿಯೇ ಬೇಕಾಗಿತ್ತು. ಸೋನಾಕ್ಷಿ ಈ ಪಾತ್ರಕ್ಕೆ ಸರಿಹೊಂದುತ್ತಾರೆ. ಅವರ ಪಾತ್ರದ ಬಗ್ಗೆ ಕುತೂಹಲ ಉಳಿಸಿಕೊಂಡಿದ್ದೇವೆ. ಈ ಸಿನಿಮಾದ ಮುಖ್ಯ ಗ್ಲಾಮರಸ್‌ ಭಾಗ ಅವರದೇ’ ಎಂದು ನವದೀಪ್‌ ಸಿಂಗ್‌ ಹೇಳಿದ್ದಾರೆ.
2013ರಲ್ಲಿ ‘ಬುಲೆಟ್‌ ರಾಜ’ ಸಿನಿಮಾದಲ್ಲಿ ಸೈಫ್‌ ಅಲಿ ಖಾನ್‌ ಹಾಗೂ ಸೋನಾಕ್ಷಿ ಸಿನ್ಹಾ ಒಟ್ಟಿಗೆ ಕೆಲಸ ಮಾಡಿದ್ದರು. ಈಗ ಆರು ವರ್ಷಗಳ ನಂತರ ಈ ಚಿತ್ರದಲ್ಲಿ ಮತ್ತೆ ಒಂದಾಗಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.