‘ಮಾಸ್ಟರ್’ ಟ್ರೇಲರ್ ಬಿಡುಗಡೆ ಯಾವಾಗ? ದಳಪತಿ ಅಭಿಮಾನಿಗಳ ದುಂಬಾಲು

‘ಬಿಗಿಲ್’ -ತಮಿಳಿನ ದಳಪತಿ ವಿಜಯ್ ಅವರ ವೃತ್ತಿಬದುಕಿನಲ್ಲಿಯೇ ಗಲ್ಲಾಪೆಟ್ಟಿಗೆಯಲ್ಲಿ ಹೊಸ ದಾಖಲೆ ಬರೆದ ಚಿತ್ರ. ಲೋಕೇಶ್ ಕನಕರಾಜ್ ಮತ್ತು ವಿಜಯ್ ಕಾಂಬಿನೇಷನ್ ನಡಿ ತೆರೆಗೆ ಸಿದ್ಧವಾಗಿರುವ ‘ಮಾಸ್ಟರ್’ ಚಿತ್ರದ ಮೇಲೂ ಈಗ ನಿರೀಕ್ಷೆ ಇಮ್ಮಡಿಗೊಂಡಿದೆ. ಕಳೆದ ಏಪ್ರಿಲ್ 9ರಂದೇ ಈ ಸಿನಿಮಾ ಬಿಡುಗಡೆಯಾಗಬೇಕಿತ್ತು. ಕೊರೊನಾ ಮಹಾಮಾರಿಯು ಚಿತ್ರತಂಡದ ಆಸೆಗೆ ತಣ್ಣೀರೆರಚಿದೆ. ಹಾಗಾಗಿ, ಇದರ ಬಿಡುಗಡೆಯ ದಿನಾಂಕ ‌ಮುಂದಕ್ಕೆ‌ ಹೋಗಿದೆ.

ಇದು ದಳಪತಿಯ ಅಭಿಮಾನಿಗಳಿಗೂ‌ ನಿರಾಸೆ ಮೂಡಿಸಿದೆ. ಆದರೆ, ಚಿತ್ರದ ಟ್ರೇಲರ್‌ ಬಿಡುಗಡೆಗೊಳಿಸುವಂತೆ ಅಭಿಮಾನಿಗಳು ಚಿತ್ರತಂಡಕ್ಕೆ‌ ದುಂಬಾಲು ಬಿದ್ದಿದ್ದಾರೆ‌‌. ಹಾಗಾಗಿ, ಲಾಕ್ ಡೌನ್ ಅವಧಿ‌ ಮುಗಿದ ಬಳಿಕ ಟ್ರೇಲರ್‌ ಬಿಡುಗಡೆಗೊಳಿಸಿ ಅಭಿಮಾನಿಗಳ ಆಸೆ ಈಡೇರಿಸಲು ನಿರ್ಮಾಪಕರು‌ ನಿರ್ಧರಿಸಿದ್ದಾರಂತೆ. ಅದಕ್ಕಾಗಿ ಸೂಕ್ತ ದಿನಾಂಕದ‌ ಹುಡುಕಾಟದಲ್ಲಿದ್ದಾರೆ ಎಂಬುದು ಕಾಲಿವುಡ್ ಅಂಗಳದಿಂದ ಕೇಳಿಬರುತ್ತಿರುವ ಹೊಸ ಸುದ್ದಿ.

ಬೇಸಿಗೆ ರಜೆಯ ಅವಧಿಯಲ್ಲಿ 'ಮಾಸ್ಟರ್' ಸಿನಿಮಾವನ್ನು ಬಿಡುಗಡೆಗೊಳಿಸಿ ಜನರನ್ನು ಚಿತ್ರಮಂದಿರದತ್ತ ಸೆಳೆಯಲು ಚಿತ್ರತಂಡ‌ ತೀರ್ಮಾನಿಸಿತ್ತು. ಈಗ ಬಿಡುಗಡೆಯ ದಿನಾಂಕ ಮುಂದೂಡಿಕೆಯಾಗಿದೆ. ಹೊಸ ದಿನಾಂಕ ಘೋಷಿಸುವುದು ನಿರ್ಮಾಪಕರಿಗೆ ತಲೆನೋವು‌ ತಂದಿದೆಯಂತೆ. ಯಾವುದಾದರೂ ಹಬ್ಬದ ವಾರಾಂತ್ಯದಲ್ಲಿ ಸಿನಿಮಾ ಬಿಡುಗಡೆಗೆ ಚಿತ್ರತಂಡ ಸಿದ್ಧತೆ‌ ನಡೆಸಿದೆ.

ಈ ನಡುವೆಯೇ ‘ನಾವು ಬದುಕುವುದು‌ ಮುಖ್ಯ‌‌. ಸಂಭ್ರಮ ಇದ್ದೇ ಇರುತ್ತದೆ. ಸೂಕ್ತ‌ ದಿನದಂದು ‘ಮಾಸ್ಟರ್’ ಚಿತ್ರ ತೆರೆ ಕಾಣಲಿದೆ. ಅಲ್ಲಿಯವರೆಗೂ ಮನೆಯಲ್ಲಿದ್ದು, ಆರೋಗ್ಯದ ಬಗ್ಗೆ ಗಮನಹರಿಸಿ’ ಎಂದು‌ ನಿರ್ದೇಶಕ ಲೋಕೇಶ್ ಕನಕರಾಜ್ ಟ್ವೀಟ್‌‌‌ ಮೂಲಕ ಅಭಿಮಾನಿಗಳಿಗೆ ಮನವಿ ಮಾಡಿದ್ದಾರೆ.

ಈ ಚಿತ್ರದಲ್ಲಿ ವಿಜಯ್ ಅವರದ್ದು ಕಾಲೇಜು ಪ್ರೊಫೆಸರ್ ಪಾತ್ರ. ಗ್ಯಾಂಗ್‌ಸ್ಟರ್ ವಿರುದ್ಧ ಅವರು ಸೆಣಸಾಟ ನಡೆಸಲಿದ್ದಾರಂತೆ‌‌. ಅವರಿಗೆ‌ ಮಾಳವಿಕಾ‌ ಮೋಹನ್ ಜೋಡಿಯಾಗಿದ್ದಾರೆ. ವಿಜಯ್ ಸೇತುಪತಿ ಖಳನಟನಾಗಿ ಬಣ್ಣ ಹಚ್ಚಿದ್ದಾರೆ.