ಫ್ಯಾಕ್ಟ್ ಚೆಕ್: ಮುಸ್ಲಿಂ ವ್ಯಕ್ತಿ ಹಿಂದೂ ಮಹಿಳೆಯೊಂದಿಗಿರುವ ವಿಡಿಯೊ ನಿಜವೇ?
ಒಬ್ಬ ವ್ಯಕ್ತಿಯು ಪೊಲೀಸರೊಂದಿಗೆ ಮನೆಯೊಂದರೊಳಗೆ ಪ್ರವೇಶ ಮಾಡುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಇದು ವಾಸ್ತವ ಘಟನೆಯ ವಿಡಿಯೊ ಎಂದು ಪ್ರತಿಪಾದಿಸಲಾಗುತ್ತಿದೆ. ಒಬ್ಬ ಮುಸ್ಲಿಂ ವ್ಯಕ್ತಿಯು ಹಿಂದೂ ಎಂದು ಹೇಳಿಕೊಂಡು ಮಹಿಳೆಯೊಬ್ಬರೊಂದಿಗೆ ವಿವಾಹೇತರ ಸಂಬಂಧ ಹೊಂದಿದ್ದ. ಆತ ಮಹಿಳೆಯ ಮನೆಯಲ್ಲಿ ಇರುವಾಗ ಆ ಮಹಿಳೆಯ ಗಂಡ ಮತ್ತು ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾನೆ ಎಂದು ಪೋಸ್ಟ್ ಹಂಚಿಕೊಳ್ಳುತ್ತಿರುವವರು ಪ್ರತಿ‍ಪಾದಿಸುತ್ತಿದ್ದಾರೆ. ಆದರೆ, ಇದು ಸುಳ್ಳು ಸುದ್ದಿ.
ವಿಡಿಯೊದ ಕೀಫ್ರೇಮ್‌ ಅನ್ನು ರಿವರ್ಸ್ ಇಮೇಜ್ ಸರ್ಚ್‌ಗೆ ಒಳಪಡಿಸಿದಾಗ, ಫೇಸ್‌ಬುಕ್‌ನಲ್ಲಿ ಮೊಂಟಿ ದೀಪಕ್ ಶರ್ಮ ಎನ್ನುವ ವ್ಯಕ್ತಿ ಅಂಥದ್ದೇ ವಿಡಿಯೊ ಅನ್ನು ಹಂಚಿಕೊಂಡಿರುವುದು ಕಂಡಿತು. ‘ಇದು ಕಾಲ್ಪನಿಕ ವಿಡಿಯೊ ಆಗಿದ್ದು, ಮನರಂಜನೆಯ ಉದ್ದೇಶದಿಂದ ರೂಪಿಸಲಾಗಿದೆ. ಯಾವುದೇ ವೃತ್ತಿ ಅಥವಾ ಸಮುದಾಯವನ್ನು ಅವಮಾನಿಸಲಾಗಿಲ್ಲ’ ಎಂದು ಅದರ ಅಡಿಬರಹದಲ್ಲಿ ಉಲ್ಲೇಖಿಸಿದ್ದರು. ದೀಪಕ್ ಅವರೇ ಸೃಷ್ಟಿಸಿದ ವಿಡಿಯೊ ಅದಾಗಿದ್ದು, ವಿಡಿಯೊದಲ್ಲಿ ಗಂಡನ ಪಾತ್ರವನ್ನು ಅವರೇ ನಿರ್ವಹಿಸಿದ್ದಾರೆ. ವ್ಯಕ್ತಿಯೊಬ್ಬ ಮನರಂಜನೆಗಾಗಿ ರೂಪಿಸಿದ ವಿಡಿಯೊ ಅನ್ನು ವಾಸ್ತವ ಘಟನೆಯ ವಿಡಿಯೊ ಎಂದು ಸುಳ್ಳು ಪ್ರತಿಪಾದನೆಯೊಂದಿಗೆ ಹಂಚಿಕೊಳ್ಳಲಾಗುತ್ತಿದೆ ಎಂದು ‘ಫ್ಯಾಕ್ಟ್‌ಲಿ’ ಫ್ಯಾಕ್ಟ್ ಚೆಕ್ ವರದಿ ತಿಳಿಸಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.