ಅರುಣಾಚಲ ಪ್ರದೇಶ: ಸೇನಾನೆಲೆ ಮೇಲೆ ಶಂಕಿತ ಉಗ್ರರ ದಾಳಿ

ಇಟಾನಗರ: ಅರುಣಾಚಲಪ್ರದೇಶದ ನೌಸಾದಲ್ಲಿರುವ ಸೇನಾಪಡೆಯ ಕಾರ್ಯಾಚರಣೆ ನೆಲೆ (ಸಿಒಬಿ) ಮೇಲೆ ಶಂಕಿತ ಭಯೋತ್ಪಾದಕರು ಮಂಗಳವಾರ ದಾಳಿ ನಡೆಸಿದ್ದಾರೆ.

ದಾಳಿಯಿಂದ ಯಾವುದೇ ಸಾವು–ನೋವು, ಅಥವಾ ಸ್ವತ್ತು ಹಾನಿಗೊಳಗಾಗಿರುವ ವರದಿಯಾಗಿಲ್ಲ. ನಾಗಾಲ್ಯಾಂಡ್‌ ರಾಷ್ಟ್ರೀಯವಾದಿ ಸಮಾಜವಾದಿ ಸಂಘಟನೆ (ಎನ್‌ಎಸ್‌ಸಿಎನ್–ಖಪ್ಲಂಗ್) ಬಂಡುಕೋರರು ಈ ದಾಳಿ ನಡೆಸಿರಬಹುದು. ಬೆಳಗಿನ ಜಾವ 1.15ರ ವೇಳೆಗೆ ಗುಂಪೊಂದು ಸಿಒಬಿ ಮೇಲೆ 5–10 ಬಾರಿ ಗುಂಡು ಹಾರಿಸಿದೆ ಮತ್ತು ಲಾಥೋಡ್ ಗ್ರೆನೇಡ್ ಎಸೆದಿದೆ. ಆದರೆ ಇದರಿಂದ ಯಾವುದೇ ಹಾನಿಯಾಗಿಲ್ಲ. ಕಾವಲಿಗಿದ್ದ ಸಿಬ್ಬಂದಿ ತಕ್ಷಣವೇ ಪ್ರತಿದಾಳಿ ನಡೆಸಿದ್ದು, ಗುಂಪು ತಕ್ಷಣವೇ ಪರಾರಿಯಾಗಿದೆ ಎಂದು ಕೊಹಿಮಾದ ರಕ್ಷಣಾ ಪಡೆ ವಕ್ತಾರ ಕರ್ನಲ್ ಚಿರಂಜೀತ್ ಕುಂವರ್ ತಿಳಿಸಿದ್ದಾರೆ.

ದಾಳಿ ನಡೆಸಿದವರನ್ನು ಪತ್ತೆ ಮಾಡಲು ಶೋಧ ಕಾರ್ಯಾಚರಣೆ ನಡೆಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.