ರೂ.11 ಸಾವಿರ ಕೋಟಿ ವಿದೇಶಿ ದೇಣಿಗೆ

ನವದೆಹಲಿ: ದೇಶದ ಸ್ವಯಂ ಸೇವಾ ಸಂಸ್ಥೆ­ಗಳು  (ಎನ್‌ಜಿಒ) 2011–12ನೇ ಸಾಲಿನಲ್ಲಿ ವಿದೇಶಗಳಿಂದ ರೂ.11,­546.29 ಕೋಟಿಗಳಷ್ಟು ಮೊತ್ತದ ದೇಣಿಗೆ ಸಂಗ್ರಹಿಸಿವೆ.

ನಿಧಿ ಸಂಗ್ರಹ ಪಟ್ಟಿಯಲ್ಲಿ ದೆಹಲಿ ಮೊದಲ ಸ್ಥಾನದ­ಲ್ಲಿ­ದ್ದರೆ, ಕರ್ನಾಟಕ 5ನೇ ಕ್ರಮಾಂಕದಲ್ಲಿದೆ ಎಂದು ಕೇಂದ್ರ ಸರ್ಕಾರ ಬಿಡುಗಡೆ ಮಾಡಿರುವ ಇತ್ತೀಚಿನ ವರದಿಯೊಂದು ಹೇಳಿದೆ.

ದೇಶದಲ್ಲಿನ ‘ಎನ್‌ಜಿಒ’ಗಳು 2011­–12ನೇ ಸಾಲಿನಲ್ಲಿ ಸಂಗ್ರಹಿಸಿದ ದೇಣಿಗೆಯ ಬಳಕೆ ಕುರಿತು ಗೃಹ ಸಚಿವಾಲಯವು ಇತ್ತೀಚೆಗೆ ಬಿಡುಗಡೆ ಮಾಡಿರುವ ವಾರ್ಷಿಕ ವರದಿಯಲ್ಲಿ ಈ ವಿವರ ಇದೆ. ಸ್ವಯಂ ಸೇವಾ ಸಂಸ್ಥೆಗಳು ವಿದೇಶಿ ದೇಣಿಗೆಯ ಖರ್ಚುವೆಚ್ಚದ ಬಗ್ಗೆ ನಿಖರವಾದ ಲೆಕ್ಕಪತ್ರ ಇರಿಸದಿದ್ದರೆ ವಿದೇಶಿ ಕೊಡುಗೆ (ನಿಯಂತ್ರಣ) ಕಾಯ್ದೆಯಡಿ ಕಠಿಣ ಕ್ರಮಕ್ಕೆ ಗುರಿಯಾಗಬೇಕಾಗುತ್ತಿದೆ.

ಅಕ್ರಮ ಹಣ ವರ್ಗಾವಣೆ ಮತ್ತು ಭಯೋತ್ಪಾದಕರಿಗೆ ಹಣಕಾಸು ನೆರವು ನೀಡಿದ ಗಂಭೀರ ಆರೋಪಕ್ಕೂ ಗುರಿಯಾಗಬೇಕಾಗುತ್ತದೆ ಎಂದು ಈ ವರದಿ ಎಚ್ಚರಿಕೆ ನೀಡಿದೆ. ಸ್ವಯಂ ಸೇವಾ ಸಂಸ್ಥೆಗಳು ಸಲ್ಲಿಸಿ­ರುವ ವಾರ್ಷಿಕ ಲೆಕ್ಕಪತ್ರ ವರದಿ ಆಧರಿಸಿ  ಗೃಹ ಸಚಿವಾಲಯ ಈ ವರದಿಯನ್ನು ಪ್ರಕಟಿಸಿದೆ. ವಿದೇಶಿ ಕೊಡುಗೆ (ನಿಯಂತ್ರಣ) ಕಾಯ್ದೆ­ಯಡಿಯಲ್ಲಿ ಒಟ್ಟಾರೆ 43,527 ನೋಂದಾಯಿತ ‘ಎನ್‌ಜಿಒ’­ಗಳಿದ್ದು, ಇವುಗಳಲ್ಲಿ ಈಗ 22,702 ಸಂಸ್ಥೆಗಳು ಮಾತ್ರ ವಾರ್ಷಿಕ ಲೆಕ್ಕಪತ್ರದ ವರದಿಯನ್ನು ಸಲ್ಲಿಸಿವೆ.

ಇದರ ವಿದೇಶಿ ದೇಣಿಗೆಯ ಸಂಗ್ರಹ ಮೊತ್ತವೇ ರೂ.11,500 ಕೋಟಿಗೂ ಹೆಚ್ಚಿದ್ದು, ಎಲ್ಲಾ ‘ಎನ್‌ಜಿಒ’ಗಳಿಂದ ಲೆಕ್ಕಪತ್ರ ಸಲ್ಲಿಕೆ­ಯಾದರೆ ಈ ಮೊತ್ತದಲ್ಲಿ ಇನ್ನೂ ಏರಿಕೆ ಆಗಲಿದೆ. ಈಗ ಲೆಕ್ಕಪತ್ರ ವರದಿ ಸಲ್ಲಿಸಿ­ರುವ ‘ಎನ್‌ಜಿಒ’ಗಳಲ್ಲಿ 9,509 ಸಂಸ್ಥೆಗಳು ವಿದೇಶ­ದಿಂದ ದೇಣಿಗೆ ಸಂಗ್ರಹಿಸಿಲ್ಲ ಎಂದು ತಿಳಿಸಿವೆ.

‘ವರ್ಷದಿಂದ ವರ್ಷಕ್ಕೆ ವಿದೇಶಗಳಿಂದ ದೇಣಿಗೆ ಸಂಗ್ರಹಿಸು­ತ್ತಿರುವ ಸ್ವಯಂ ಸೇವಾ ಸಂಸ್ಥೆಗಳ ಸಂಖ್ಯೆ ಏರುತ್ತಿದೆ. ಇನ್ನೂ ಹಲವು ಸಂಸ್ಥೆಗಳು ಕಡ್ಡಾಯವಾಗಿ ಸಲ್ಲಿಸಬೇಕಿರುವ ವಾರ್ಷಿಕ ಲೆಕ್ಕಪತ್ರ ವರದಿ ಸಲ್ಲಿಸದಿ­ರುವುದು ಆತಂಕಕ್ಕೆ ಕಾರಣವಾಗಿದೆ. ನೋಂದಾಯಿಸದ 20 ಲಕ್ಷಕ್ಕೂ ಹೆಚ್ಚು ಸ್ವಯಂ ಸೇವಾ ಸಂಸ್ಥೆ­ಗಳು ದೇಶದಲ್ಲಿವೆ ಎಂದು ವರದಿ ತಿಳಿಸಿದೆ.