ಅಸ್ಸಾಂ | ಗೋ ಹತ್ಯೆ ಆರೋಪ: 133 ಮಂದಿಯ ಬಂಧನ

ಗುವಾಹಟಿ: ಅಕ್ರಮವಾಗಿ ಗೋ ಹತ್ಯೆ ಮತ್ತು ಗೋಮಾಂಸ ಮಾರಾಟ ಮಾಡಿದ ಆರೋಪದಡಿ ಅಸ್ಸಾಂನಲ್ಲಿ ಮಂಗಳವಾರ 133 ಜನರನ್ನು ಪೊಲೀಸರು ಬಂಧಿಸಿದ್ದು, ಗೋಮಾಂಸ ಎನ್ನಲಾದ ಒಂದು ಟನ್‌ ತೂಕದ ವಸ್ತುವನ್ನು ಜಪ್ತಿ ಮಾಡಿದ್ದಾರೆ.

ಗೋ ಹತ್ಯೆ ಮತ್ತು ರೆಸ್ಟೋರೆಂಟ್‌ಗಳಲ್ಲಿ ಗೋ ಮಾಂಸ ಮಾರಾಟವಾಗುವ ಮೂಲಕ ಅಸ್ಸಾಂ ಗೋ ಸಂರಕ್ಷಣಾ ಕಾಯ್ದೆಯ ಉಲ್ಲಂಘನೆಯಾಗುತ್ತಿರುವ ಬಗ್ಗೆ ಹಲವು ಘಟನೆಗಳು ವರದಿಯಾದ ಕಾರಣ ಸ್ವಯಂಪ್ರೇರಿತವಾಗಿ ಕಾರ್ಯಾಚರಣೆ ನಡೆಸಲಾಗಿದೆ ಎಂದು ಐಜಿಪಿ ಅಖಿಲೇಶ್‌ ಕುಮಾರ್‌ ಸಿಂಗ್‌ ಅವರು ತಿಳಿಸಿದ್ದಾರೆ.

‘ರಾಜ್ಯದಾದ್ಯಂತ 112 ಹೋಟೆಲ್‌ಗಳ ಮೇಲೆ ದಾಳಿ ನಡೆಸಲಾಗಿದೆ. ಕಾರ್ಯಾಚರಣೆ ಮುಂದುವರಿಯಲಿದೆ’ ಎಂದು ತಿಳಿಸಿದ್ದಾರೆ.

ಗೋಮಾಂಸ ಸೇವನೆಗೆ ಅಸ್ಸಾಂನಲ್ಲಿ ನಿರ್ಬಂಧ‌ವಿಲ್ಲ. ಆದರೆ 2021ರ ಗೋಸಂರಕ್ಷಣಾ ಕಾಯ್ದೆಯ ಅನ್ವಯ ಗೋ ಹತ್ಯೆ ಹಾಗೂ ಹಿಂದೂ, ಜೈನ ಮತ್ತು ಸಿಖ್‌ ಧರ್ಮದವರು ಬಹುಸಂಖ್ಯಾತರಾಗಿರುವ ಪ್ರದೇಶಗಳಲ್ಲಿ ಮತ್ತು ‌ದೇವಾಲಯಗಳ 5 ಕಿ.ಮೀ ವ್ಯಾಪ್ತಿಯಲ್ಲಿ ಗೋಮಾಂಸ ಮಾರಾಟಕ್ಕೆ ನಿಷೇಧ ಹೇರಲಾಗಿದೆ.