ಸಿಗರೇಟು ವ್ಯಸನಿಗಳಿಗೆ ಕೊರೊನಾ ವೈರಸ್‌ ಸೋಂಕು ಸಾಧ್ಯತೆ ಹೆಚ್ಚಿದೆಯೇ?
ಕೊರೊನಾ ವೈರಸ್‌ ಸೋಂಕು ಶ್ವಾಸಕೋಶದ ಮೇಲೆ ಪರಿಣಾಮ ಬೀರುವ ಮೂಲಕ ಉಸಿರಾಟಕ್ಕೆ ಅಡ್ಡಿಯುಂಟು ಮಾಡುತ್ತದೆ ಎನ್ನುವುದು ಈಗಾಗಲೇ ಜನಜನಿತವಾಗಿರುವ ವಿಚಾರ. ಶ್ವಾಸಕೋಶದ ಆರೋಗ್ಯಕ್ಕೂ ದೂಮಪಾನದ ವ್ಯಸನಕ್ಕೂ ನೇರ ಸಂಬಂಧವಿದೆ. ಈ ಹಿನ್ನೆಲೆಯಲ್ಲಿಯೇ 'ಸಿಗರೇಟು ವ್ಯಸನಿಗಳಿಗೆ ಕೊರೊನಾ ವೈರಸ್‌ ಸೋಂಕ ಸಾಧ್ಯತೆ ಹೆಚ್ಚಿದೆಯೇ?' ಎಂಬ ಪ್ರಶ್ನೆಗೆ ಉತ್ತರ ಹುಡುಕಲು ಯತ್ನಿಸಿದೆವು.
ಈ ಬಗ್ಗೆವಿಶ್ವ ಆರೋಗ್ಯ ಸಂಸ್ಥೆ ಏನು ಹೇಳಿದೆ? ವೈದ್ಯರು ಏನು ಹೇಳುತ್ತಾರೆ? ಇಲ್ಲಿದೆ ವಿವರ...
ಧೂಮಪಾನ ಮಾಡುವವರಿಗೆ ಕೋವಿಡ್‌ 19 ಸೋಂಕು ತಗುಲುವ ಸಾಧ್ಯತೆ ಬೇರೆಲ್ಲರಿಗಿಂತಲೂ ಹೆಚ್ಚು ಎಂದು ವಿಶ್ವ ಆರೋಗ್ಯ ಸಂಸ್ಥೆ ಬಿಡುಗಡೆ ಮಾಡಿರುವ ಪ್ರಶ್ನೋತ್ತರದಲ್ಲಿ ತಿಳಿಸಿದೆ.
ಕೊರೊನಾ ವೈರಸ್‌ ಪಿಡುಗಾಗಿ ಪರಿಣಮಿಸಿರುವ ಈ ಹೊತ್ತಿನಲ್ಲಿ ಧೂಮಪಾನ ಮಾಡುವುದು ವೈರಸ್‌ಆಹ್ವಾನಿಸಿಕೊಂಡಂತೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಪ್ರತಿನಿಧಿಗಳುಮತ್ತು ವೈದ್ಯರೂ ಅಭಿಪ್ರಾಯಪಟ್ಟಿದ್ದಾರೆ.
ಧೂಮಪಾನದ ವ್ಯಸನದಿಂದ ಶ್ವಾಸಕೋಶ ಮತ್ತು ಶ್ವಾಸನಾಳಗಳು ಶಕ್ತಿ ಕಡಿಮೆಯಾಗಿರುತ್ತದೆ. ಇಂಥ ಸಂದರ್ಭದಲ್ಲಿಧೂಮ ವ್ಯಸನಿಗಳಿಗೆ, ಶ್ವಾಸಕೋಶವನ್ನೇ ಗುರಿಯಾಗಿಸಿಕೊಂಡು ದಾಳಿ ಮಾಡುವ ಕೊರೊನಾ ವೈರಸ್‌ನ ಸೋಂಕು ತಗುಲುವ ಸಾಧ್ಯತೆ ಹೆಚ್ಚಾಗಿರುತ್ತದೆ.
‘ಸಿಗರೇಟು ಸೇದುವವರಲ್ಲಿ ಶ್ವಾಸಕೋಶ ಮತ್ತು ಉಸಿರಾಟದ ನಾಳಗಳು ಅದಾಗಲೇ ಹಾನಿಗೊಳಗಾಗಿರುತ್ತದೆ. ಇಂಥ ಸಂದರ್ಭದಲ್ಲಿ ಈ ಹೊಸ ವೈರಸ್‌ ತಾಗಿದರೆ ಅದು ಮಾರಕವಾಗಿ ಪರಿಣಮಿಸಲಿದೆ’ ಎಂದು ಲೂಧಿಯಾನದ ಫೋರ್ಟೀಸ್‌ ಆಸ್ಪತ್ರೆಯ ನಿರ್ದೇಶಕ ಡಾ. ಹರ್ಮೀಂದರ್‌ ಪನ್ನು ಅವರು ಹೇಳಿರುವುದಾಗಿ ಇಂಡಿಯನ್‌ ಎಕ್ಸ್‌ಪ್ರೆಸ್‌ ವರದಿ ಮಾಡಿದೆ. ಅಲ್ಲದೆ, ಸಿಗರೇಟು ಸೇದುವ ಚಟ ತೊರೆಯಲು ಇದು ಸಕಾಲ ಎಂಬ ಅವರ ಹೇಳಿಕೆಯನ್ನೂ ಪತ್ರಿಕೆ ಉಲ್ಲೇಖಿಸಿದೆ.
ದಿನಕ್ಕೊಂದು ಸಿಗರೇಟ್ ಸೇದುವವರಿರಲಿ, ಹಲವು ದಿನಗಳಿಗೊಮ್ಮೆ ಸೇದುವವರಿರಲಿ, ನಿರಂತರವಾಗಿ ದಿನಕ್ಕೆ ಹಲವು ಸಿಗರೇಟ್‌ಗಳನ್ನು ಸೇದುವವರಿರಲಿ ಕೋವಿಡ್‌ ಸೋಂಕು ತಗುಲುವ ಸಾಧ್ಯತೆ ಇವರೆಲ್ಲರಿಗೂ ಒಂದೇ ಎಂದೂ ಅವರು ತಿಳಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.