ಅನೇಕರಿಗೆ ಕುಟುಂಬವೇ ಪಕ್ಷ, ಬಿಜೆಪಿಗೆ ಪಕ್ಷವೇ ಕುಟುಂಬ: ಜೆ.ಪಿ.ನಡ್ಡಾ

ನವದೆಹಲಿ: ‘ಅನೇಕ ಪಕ್ಷಗಳಿವೆ, ಅಲ್ಲಿ ಒಂದು ಕುಟುಂಬವೇ ಪಕ್ಷವಾಗಿರುತ್ತದೆ. ಆದರೆ, ಬಿಜೆಪಿ ವಿಚಾರದಲ್ಲಿ ಹಾಗಲ್ಲ. ಇಲ್ಲಿ ಇಡೀ ಪಕ್ಷವೇ ಒಂದು ಕುಟುಂಬ’ ಎಂದು ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಹೇಳಿದ್ದಾರೆ.

ಉತ್ತರಾಖಂಡ ಬಿಜೆಪಿ ಕಚೇರಿಗೆ ಶಂಕುಸ್ಥಾಪನೆ ಕಾರ್ಯಕ್ರಮವನ್ನು ಉದ್ದೇಶಿಸಿ ವಿಡಿಯೊ ಕಾನ್ಫರೆನ್ಸ್ ಮೂಲಕ ಮಾತನಾಡಿದ ಅವರು, ಪಕ್ಷದ ಕಚೇರಿಯು ಕಾರ್ಯಕರ್ತರಿಗೆ ಮೌಲ್ಯ ನೀಡುತ್ತದೆ ಎಂದಿದ್ದಾರೆ.

ಇದನ್ನೂ ಓದಿ:ನಾನು ಮೋದಿಯ ಹನುಮ ಎಂದ ಚಿರಾಗ್‌; ‘ಮತವಿಭಜಕ’ ಎಂದು ದೂರ ತಳ್ಳಿದ ಬಿಜೆಪಿ

‘ಪಕ್ಷದ ಕಚೇರಿಯು ನಾಯಕನೊಬ್ಬನ ಮನೆಯಿಂದ ನಡೆಯುವುದಾದರೆ ಪಕ್ಷವು ವ್ಯಕ್ತಿಗೆ ಸೇರಿದ್ದಾಗುತ್ತದೆ. ಇತರ ಪಕ್ಷಗಳಲ್ಲಿ ನೀವದನ್ನು ನೋಡಿದ್ದೀರಿ. ಅಂತಹ ಕಡೆ ಕುಟುಂಬವೇ ಪಕ್ಷವಾಗಿರುತ್ತದೆ. ಆದರೆ ನಮ್ಮಲ್ಲಿ, ಪಕ್ಷವೇ ನಮ್ಮ ಪರಿವಾರ (ಕುಟುಂಬ) ಆಗಿದೆ’ ಎಂದು ಕಾಂಗ್ರೆಸ್ಸನ್ನು ಗುರಿಯಾಗಿಸಿ ನಡ್ಡಾ ಹೇಳಿದ್ದಾರೆ.

‘ದೇಶದಲ್ಲಿರುವ ಇತರ ಪಕ್ಷಗಳನ್ನು ಗಮನಿಸಿ. ಅವುಗಳು ಕುಟುಂಬಕ್ಕೆ ಸೀಮಿತಗೊಂಡಿವೆ. ಅದು ಕಾಂಗ್ರೆಸ್ ಇರಬಹುದು ಅಥವಾ ಇತರ ಯಾವುದೇ ಪ್ರಾದೇಶಿಕ ಪಕ್ಷಗಳಾಗಿರಬಹುದು. ಆ ಪಕ್ಷದವರೆಲ್ಲ ತಮ್ಮ ಸಹೋದರರನ್ನು, ಸಹೋದರಿಯರನ್ನು, ತಾಯಿ, ಮಕ್ಕಳನ್ನು ರಕ್ಷಿಸುತ್ತಿವೆ. ಅಳಿಯಂದಿರೊಂದಿಗೆ ರಹಸ್ಯವಾಗಿ ಕಾರ್ಯಾಚರಿಸುತ್ತಿದ್ದಾರೆ’ ಎಂದು ಅವರು ಟೀಕಿಸಿದ್ದಾರೆ.

ಇದನ್ನೂ ಓದಿ:ಮೋದಿ ಸರ್ಕಾರದಿಂದ ವಿಶೇಷ ಸ್ನೇಹಿತರ ಜೇಬು ತುಂಬಿಸುವ ಕೆಲಸ: ರಾಹುಲ್ ವ್ಯಂಗ್ಯ