ನನ್ನ ಹತ್ಯೆಗೆ ಬಿಎಸ್‌ಪಿಯಿಂದ ಬಹುಮಾನ ಘೋಷಣೆ: ಕಾಂಗ್ರೆಸ್‌ ನಾಯಕ ಉದಿತ್ ರಾಜ್‌

ನವದೆಹಲಿ: ‘ನನ್ನ ಹತ್ಯೆ ಮಾಡುವವರಿಗೆ ಬಹುಜನ ಸಮಾಜವಾದಿ ಪಕ್ಷ(ಬಿಎಸ್‌ಪಿ) ಬಹುಮಾನ ಘೋಷಿಸಿದೆ’ ಎಂದು ಕಾಂಗ್ರೆಸ್‌ ನಾಯಕ ಉದಿತ್ ರಾಜ್‌ ಆರೋಪಿಸಿದ್ದಾರೆ.

‘ಬಿಎಸ್‌ಪಿ ಮುಖ್ಯಸ್ಥೆ ಮಾಯಾವತಿ, ಬಿಎಸ್‌ಪಿ ರಾಷ್ಟ್ರೀಯ ಸಂಯೋಜಕ ಆಕಾಶ್ ಆನಂದ್ ಅವರ ಟ್ವೀಟ್‌ಗಳನ್ನು ನೀವು ಗಮನಿಸಿರಬಹುದು. ಅದರಲ್ಲಿ ಅವರು ಬೆದರಿಕೆಯ ಧ್ವನಿಯಲ್ಲಿ ಬರೆದಿದ್ದಾರೆ. ಅದಾದ ಬಳಿಕ ನನಗೆ ಕೊಲೆ ಬೆದರಿಕೆಗಳು ಬರುತ್ತಿವೆ. ಇಂತಹ ಸುಮಾರು 30 ಕರೆಗಳನ್ನು ನಾನು ರೆಕಾರ್ಡ್ ಮಾಡಿಕೊಂಡಿದ್ದೇನೆ’ ಎಂದು ಸುದ್ದಿಸಂಸ್ಥೆ ಎಎನ್‌ಐಗೆ ಹೇಳಿದ್ದಾರೆ.

‘ನನ್ನ ಹತ್ಯೆಗೆ ಬಹುಮಾನ ಘೋಷಿಸಲಾಗಿದೆ. ಈ ಬಗ್ಗೆ ಫೆಬ್ರುವರಿ 18ರಂದೇ ದೂರು ದಾಖಲಿಸಿದ್ದರು ಪೊಲೀಸರು ಯಾವುದೇ ಕ್ರಮ ಕೈಗೊಂಡಿಲ್ಲ’ ಎಂದಿದ್ದಾರೆ.

‘ಬಹುಜನ ಸಮಾಜಕ್ಕೆ ಮಾಯಾವತಿ ಮೋಸ ಮಾಡಿರುವುದು ನಿಜ. ನನ್ನ ಕಂಡರೆ ಮಾಯಾವತಿಗೆ ಭಯವಿದೆ’ ಎಂದು ಹೇಳಿದ್ದಾರೆ.