ಸ್ಕೈ ಡೈನಿಂಗ್‌: ಕೈ ಕೊಟ್ಟ ಕ್ರೇನ್, ರೆಸ್ಟೊರೆಂಟ್ ವಿರುದ್ಧ ಎಫ್‌ಐಆರ್‌
ಇಡುಕ್ಕಿ: ಕ್ರೇನ್ ಸರಿಯಾಗಿ ಕಾರ್ಯನಿರ್ವಹಿಸದೇ ಇದ್ದುದಕ್ಕೆ ಇಬ್ಬರು ಮಕ್ಕಳು ಸೇರಿ ನಾಲ್ವರು ಪ್ರವಾಸಿಗರು ಅಪಾಯದಲ್ಲಿ ಸಿಲುಕಿದ ಕಾರಣ ಇಲ್ಲಿನ ‘ಸ್ಕೈ ಡೈನಿಂಗ್‌’ ರೆಸ್ಟೊರೆಂಟ್ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.
ಭೂಮೇಲ್ಮೈನಿಂದ 150 ಅಡಿ ಎತ್ತರದಲ್ಲಿ 2 ಗಂಟೆಗೂ ಹೆಚ್ಚು ಕಾಲ ಒಂದೇ ಕುಟುಂಬದ ನಾಲ್ವರು ಪ್ರವಾಸಿಗರು ಶುಕ್ರವಾರ ಮಧ್ಯಾಹ್ನ ಸಿಲುಕಿಕೊಂಡಿದ್ದರು. ಬಳಿಕ ಕಾರ್ಯಾಚರಣೆ ನಡೆಸಿ ಅವರನ್ನು ರಕ್ಷಿಸಲಾಯಿತು.
ಅಣಚಲ್‌ನಲ್ಲಿ ಸೋಜನ್‌ ಜೋಸೆಫ್‌ ಎಂಬವರ ಜಮೀನಿನಲ್ಲಿ ‘ಸ್ಕೈ ಡೈನಿಂಗ್‌’ ರೆಸ್ಟೊರೆಂಟ್ ಅನ್ನು ನಿರ್ವಹಿಸಲಾಗುತ್ತಿದೆ. ಜೋಸೆಫ್‌ ಹಾಗೂ ರೆಸ್ಟೊರೆಂಟ್‌ನ ಕಾರ್ಯನಿರ್ವಹಣೆ ಮಾಡುತ್ತಿದ್ದ ಪ್ರವೀಣ್‌ ವಿರುದ್ಧ ವೆಲ್ಲಥೂವಲ್‌ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
ಸಾರ್ವಜನಿಕ ಸುರಕ್ಷತೆಯನ್ನು ಪರಿಗಣಿಸದೇ ರೆಸ್ಟೊರೆಂಟ್ ಕಾರ್ಯನಿರ್ವಹಿಸುತ್ತಿತ್ತು ಎಂದು ಎಫ್‌ಐಆರ್‌ನಲ್ಲಿ ದಾಖಲಿಸಲಾಗಿದೆ. ಪುರಸಭೆಯ ಅನುಮತಿ ಪಡೆಯದೇ ಇದ್ದುದು ಪತ್ತೆಯಾಗಿರುವುದರಿಂದ ರೆಸ್ಟೊರೆಂಟ್ ಸ್ಥಗಿತಗೊಳಿಸುವಂತೆ ನೋಟಿಸ್‌ ಜಾರಿಗೊಳಿಸಲಾಗಿದೆ.
ಇಡುಕ್ಕಿ ಜಿಲ್ಲಾಧಿಕಾರಿಯು ಘಟನೆ ಕುರಿತು ವರದಿ ಕೇಳಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.