Covid-19 India Update | ಕೋವಿಡ್‌: ಸಕ್ರಿಯ ಪ್ರಕರಣ 4.5 ಲಕ್ಷಕ್ಕೆ ಇಳಿಕೆ

ನವದೆಹಲಿ: ಕಳೆದ 24 ಗಂಟೆಗಳಲ್ಲಿ ದೇಶದಾದ್ಯಂತ ಕೋವಿಡ್‌–19 ಸಕ್ರಿಯ ಪ್ರಕರಣಗಳ ಸಂಖ್ಯೆ3,219 ರಷ್ಟು ತಗ್ಗಿದ್ದು, ಸದ್ಯ ದೇಶದಲ್ಲಿರುವ ಸಕ್ರಿಯ ಪ್ರಕರಣಗಳ ಸಂಖ್ಯೆ 4,50,764.

ದೇಶದಾದ್ಯಂತ ಪಾಸಿಟಿವಿಟಿ ದರ ಶೇ 2.9ರಷ್ಟಿದೆ. ಕಳೆದ 21 ದಿನಗಳಿಂದ ಈ ಪಾಸಿಟಿವಿಟಿ ದರ ಪ್ರಮಾಣ ಶೇ 3ಕ್ಕಿಂತ ಕಡಿಮೆ ಇದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಸೋಮವಾರ ಬಿಡುಗಡೆ ಮಾಡಿರುವ ಪ್ರಕಟಣೆಯಲ್ಲಿ ತಿಳಿಸಿದೆ.

ಸಚಿವಾಲಯದ ಮಾಹಿತಿ ಪ್ರಕಾರ, ದೇಶದಲ್ಲಿ 37,154 ಹೊಸ ಕೋವಿಡ್‌–19 ಸೋಂಕಿನ ಪ್ರಕರಣಗಳು ವರದಿಯಾಗಿದ್ದು, 724 ಮಂದಿ ಮೃತಪಟ್ಟಿದ್ದಾರೆ. ಈ ಮೂಲಕ ದೇಶದ ಒಟ್ಟು ಕೋವಿಡ್‌ ಸೋಂಕಿತರ ಸಂಖ್ಯೆ 3,08,74,376ಕ್ಕೆ ಏರಿದೆ. ಮೃತರ ಸಂಖ್ಯೆ 4,08,899ಕ್ಕೆ ಏರಿದೆ. ಹಾಗೆಯೇ, ಗುಣಮುಖರಾಗಿರುವ ಪ್ರಮಾಣ ಮೂರು ಕೋಟಿ ದಾಟಿದೆ. ಕಳೆದ ಇಪ್ಪತ್ನಾಲ್ಕು ಗಂಟೆಗಳಲ್ಲಿ ಸೋಂಕಿತರ ಪ್ರಮಾಣ ಶೇ 1.46, ಗುಣಮುಖರ ಪ್ರಮಾಣ ಶೇ 97.22.

ದೇಶದಾದ್ಯಂತ ಭಾನುವಾರ 14,32,343 ಮಾದರಿಗಳನ್ನು ಸೋಂಕು ಪರೀಕ್ಷೆಗೆ ಒಳಪಡಿಸಲಾಯಿತು. ಈವರೆಗೆ ದೇಶದಲ್ಲಿ ಒಟ್ಟು 43,23,17,813 ಮಾದರಿಗಳನ್ನು ಪರೀಕ್ಷಿಸಲಾಗಿದೆ.