ಕೋವಿಡ್‌ನಿಂದಲೇ ಇಬ್ಬರ ಸಾವು ಪರೀಕ್ಷೆಯಲ್ಲಿ ದೃಢ

ಪುಣೆ: ಮಹಾರಾಷ್ಟ್ರದಲ್ಲಿ ಶನಿವಾರ ಮೃತಪಟ್ಟಿದ್ದ 60 ವರ್ಷದ ಮಹಿಳೆ, 52 ವರ್ಷದ ಪುರುಷನಿಗೂ ಕೋವಿಡ್‌ ಸೋಂಕು ಇತ್ತು ಎಂಬುದು ವರದಿಯಿಂದ ದೃಢಪಟ್ಟಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸೋಂಕು ಇಲ್ಲ ಎಂಬ ವರದಿ ಹಿನ್ನೆಲೆಯಲ್ಲಿ ಮಹಿಳೆಯನ್ನು ಈಚೆಗೆ ಪುಣೆಯ ನಾಯ್ಡು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿತ್ತು. ಶನಿವಾರ ಬೆಳಿಗ್ಗೆ ಆಕೆ ಸತ್ತಿದ್ದರು. ಈ ಮೊದಲೇ ಚಿಕಿತ್ಸೆ ಪಡೆದಿದ್ದರು ಎಂಬ ಹಿನ್ನೆಲೆಯಲ್ಲಿ ಮತ್ತೆ ಮಾದರಿ ಪರೀಕ್ಷೆ ನಡೆಸಿದಾಗ ವಿಷಯ ಗೊತ್ತಾಗಿದೆ ಎಂದು ಸಾಸೂನ್ ಆಸ್ಪತ್ರೆಯ ಡೀನ್ ಡಾ.ಅಜಯ್‌ ಚಂದನ್‌ವಾಲೆ ತಿಳಿಸಿದರು.

ಇದೇ ಆಸ್ಪತ್ರೆಗೆ ದಾಖಲಾಗಿದ್ದ ಪುರುಷನ ಮಾದರಿಯನ್ನು ಪರೀಕ್ಷೆಗೆ ಕಳುಹಿಸಿದ್ದು, ಸೋಂಕು ಇತ್ತು ಎಂಬುದನ್ನು ವರದಿ ದೃಢಪಡಿಸಿದೆ.