ಚೆನ್ನೈ: ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆ (ಎಫ್ಇಎಂಎ) 1999ರ ನಿಯಮದಂತೆ ಭಾರತೀಯ ರಿಸರ್ವ್ ಬ್ಯಾಂಕ್ನಿಂದ ಒಪ್ಪಿಗೆ ಪಡೆಯದೇ ಅಕ್ರಮವಾಗಿ ಬಂಡವಾಳ ಹೂಡಿಕೆ (ಫಾರಿನ್ ಸೆಕ್ಯುರಿಟಿ) ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜಾರಿ ನಿರ್ದೇಶನಾಲಯವು(ಇ.ಡಿ) ಡಿಎಂಕೆ ಸಂಸದ ಗೌತಮ್ ಸಿಗಮಣಿ ಅವರ ₹8.60 ಕೋಟಿ ಮೌಲ್ಯದ ಆಸ್ತಿಯನ್ನು ಜಪ್ತಿ ಮಾಡಿದೆ.
ಗೌತಮ್, ಕಲ್ಲಕುರುಚ್ಚಿ ಲೋಕಸಭಾ ಕ್ಷೇತ್ರದ ಸಂಸದರಾಗಿದ್ದಾರೆ. ಎಫ್ಇಎಂಎಯ ಸೆಕ್ಷನ್ 37ಎಯಡಿ ಜಪ್ತಿ ಆದೇಶವನ್ನು ಹೊರಡಿಸಲಾಗಿದೆ ಎಂದು ಪ್ರಕಟಣೆಯಲ್ಲಿ ಇ.ಡಿ ಉಲ್ಲೇಖಿಸಿದೆ. ‘ಜಕರ್ತಾದ ಪಿಟಿ ಎಕ್ಸೆಲ್ ಮೆಜಿಂಡೊದ 2.45 ಲಕ್ಷ ಷೇರುಗಳ ಖರೀದಿಗೆ ₹41.57 ಲಕ್ಷ ಹಾಗೂ ಯು.ಎ.ಇಯ ಎಂ.ಎಸ್.ಯುನಿವರ್ಸಲ್ ಬಿಜಿನೆಸ್ ವೆಂಚರ್ಸ್ನಲ್ಲಿ ₹22.86 ಲಕ್ಷ ಹೂಡಿಕೆ ಮಾಡಿರುವುದು ತನಿಖೆ ವೇಳೆ ಬೆಳಕಿಗೆ ಬಂದಿದೆ.
‘ಯುನಿವರ್ಸಲ್ ಬಿಜಿನೆಸ್ ವೆಂಚರ್ಸ್ನಿಂದ ಪಡೆದ ₹7.05 ಕೋಟಿ ಲಾಭವನ್ನು ಸ್ವದೇಶಕ್ಕೆ ತರದೆ ವಿದೇಶದಲ್ಲೇ ಇರಿಸಿಕೊಂಡಿದ್ದರು. ಇದೇ ಕಂಪನಿಯ ಖಾತೆಯಲ್ಲಿದ್ದ ₹90.20 ಲಕ್ಷವನ್ನೂ ಸ್ವದೇಶಕ್ಕೆ ತರದೇ ವಿದೇಶದಲ್ಲೇ ಇರಿಸಲಾಗಿತ್ತು. ತಮಿಳುನಾಡಿನಲ್ಲಿ ಇರುವ ಜಮೀನು, ವಾಣಿಜ್ಯ ಹಾಗೂ ವಸತಿ ಕಟ್ಟಡಗಳು ಸೇರಿದಂತೆ ಸ್ಥಿರಾಸ್ತಿಗಳನ್ನು ಜಪ್ತಿ ಮಾಡಲಾಗಿದೆ. ಪ್ರಕರಣದ ಕುರಿತು ತನಿಖೆ ಮುಂದುವರಿದಿದೆ’ ಎಂದು ಇ.ಡಿ ತಿಳಿಸಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.