ಗುಜರಾತ್: ಪಂಚಾಯತ್‌ ಸದಸ್ಯನ ಮೇಲೆ ಹಲ್ಲೆ: ಎಎಪಿ ಶಾಸಕನ ಬಂಧನ

ಅಹಮದಾಬಾದ್‌: ಗುಜರಾತ್ ರಾಜ್ಯದ ಎಎಪಿ ಶಾಸಕ ಚೈತ್ರ ವಾಸವ ಅವರನ್ನು ಕೊಲೆ ಯತ್ನ ಆರೋಪದ ಮೇಲೆ ಬಂಧಿಸಲಾಗಿದೆ ಎಂದು ಪೊಲೀಸರು ಭಾನುವಾರ ತಿಳಿಸಿದ್ದಾರೆ.

ನರ್ಮದಾ ಜಿಲ್ಲೆಯ ದೇಡಿಯಾಪಾಡಾದಲ್ಲಿ ತಾಲ್ಲೂಕು ಪಂಚಾಯತ್ ಸದಸ್ಯನ ಮೇಲೆ ಹಲ್ಲೆ ನಡೆಸಿ, ಕೊಲೆಗೆ ಯತ್ನಿಸಿದ ಆರೋಪದ ಮೇಲೆ ಚೈತ್ರ ವಾಸವ ಅವರನ್ನು ಬಂಧಿಸಲಾಗಿದೆ.

ಶನಿವಾರ ನಡೆದ ಸಾರ್ವಜನಿಕ ಸಭೆಯಲ್ಲಿ ಈ ಘಟನೆ ನಡೆದಿದೆ ಎಂದು ಪೊಲೀಸರು ಹೇಳಿದ್ದಾರೆ. ಈ ಬಗ್ಗೆ ಸ್ಥಳೀಯ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.

ನನ್ನ ಮೇಲೆ ಮೊಬೈಲ್‌ ಫೋನ್‌ ಹಾಗೂ ಗಾಜಿನಿಂದ ಹಲ್ಲೆ ಮಾಡಲಾಗಿದ್ದು ನನಗೆ ಗಾಯಗಳಾಗಿವೆ ಎಂದು ಪಂಚಾಯತ್‌ ಸದಸ್ಯ ಸಂಜೀವ್‌ ದೂರಿನಲ್ಲಿ ತಿಳಿಸಿದ್ದಾರೆ.