ಗುಜರಾತ್‌ ಕಾಂಗ್ರೆಸ್‌ ಶಾಸಕನಿಗೆ 6 ತಿಂಗಳು ಜೈಲು

ಅಹಮದಾಬಾದ್‌: ಕಾಂಗ್ರೆಸ್‌ ಶಾಸಕ ವಿಮಲ್‌ ಚುಡಾಸಮಾ ಸೇರಿ ಮೂವರಿಗೆ 13 ವರ್ಷದ ಹಿಂದಿನ ಹಲ್ಲೆ ಮತ್ತು ಗಲಭೆ ಪ್ರಕರಣದಲ್ಲಿ ಆರು ತಿಂಗಳು ಸಾದಾ ಕಾರಾಗೃಹ ಶಿಕ್ಷೆ ವಿಧಿಸಿ ಜುನಾಗಢದ ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯ ಮಂಗಳವಾರ ಆದೇಶ ಹೊರಡಿಸಿದೆ.

ತೀರ್ಪಿನ ಬೆನ್ನಲ್ಲೇ ಚುಡುಸಮಾ ಅವರು ಕೋರ್ಟ್‌ ಆದೇಶಕ್ಕೆ ತಡೆ ತಂದು ಸೆಷನ್‌ ನ್ಯಾಯಾಲಯದಲ್ಲಿ ಮೇಲ್ಮನವಿ ಸಲ್ಲಿಸಿದ್ದಾರೆ. ನ್ಯಾಯಾಲಯವು ಜಾಮೀನಿನ ಮೇಲೆ ಅವರನ್ನು ಬಿಡುಗಡೆ ಮಾಡಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಚುಡಾಸಮಾ ಅವರು, ‘ಇದು ರಾಜಕೀಯ ಪ್ರೇರಿತ ಪ್ರಕರಣ. ನಾನು ಬಿಜೆಪಿ ಸೇರಬೇಕೆಂದು ಕೆಲವರು ಬಯಸಿದ್ದರು. ಆದರೆ ನಿರಾಕರಿಸಿದ ಕಾರಣ ನನ್ನನ್ನು ಸುಳ್ಳು ಪ್ರಕರಣದಲ್ಲಿ ಸಿಲುಕಿಸಿದ್ದಾರೆ’ ಎಂದು ಹೇಳಿದ್ದಾರೆ.