ಎಲ್‌ಎಸಿಯಲ್ಲಿರುವ ಯೋಧರಿಗೆ ಅಗತ್ಯ ಸಾಮಗ್ರಿ ಪೂರೈಕೆಗೆ ಯುದ್ಧವಿಮಾನ ನಿಯೋಜನೆ

ನವದೆಹಲಿ: ಚೀನಾದೊಂದಿಗಿನ ಸಂಘರ್ಷಈ ಚಳಿಗಾಲದಲ್ಲೂ ಮುಂದುವರಿಯವ ಸಾಧ್ಯತೆಗಳಿವೆ. ಈ ಹಿನ್ನೆಲೆಯಲ್ಲಿ ಪೂರ್ವ ಲಡಾಖ್‌ನ ವಾಸ್ತವ ನಿಯಂತ್ರಣ ರೇಖೆ (ಎಲ್‌ಎಸಿ) ಬಳಿ ಕರ್ತವ್ಯದಲ್ಲಿರುವ ಯೋಧರಿಗೆ ಅಗತ್ಯವಿರುವ ಸಾಮಗ್ರಿಗಳ ಪೂರೈಕೆಗಾಗಿ ಭಾರತ ಮಿಲಿಟರಿ ವಿಮಾನಗಳನ್ನು ನಿಯೋಜಿಸಿದೆ.

ಈ ಕಾರ್ಯಾಚರಣೆಗೆ ‘ಆಪರೇಷನ್‌ ಹರ್ಕ್ಯುಲಸ್‌’ ಎಂದು ಹೆಸರಿಡಲಾಗಿದೆ. ವಾಯುಪಡೆಯ ಸಿ–17, ಐಎಲ್‌–76 ಹಾಗೂ ಎಎನ್‌–32 ಯುದ್ಧವಿಮಾನಗಳನ್ನು ಮಂಗಳವಾರ ಈ ಕಾರ್ಯಾಚರಣೆಗೆ ಅಣಿಗೊಳಿಸಲಾಯಿತು.

‘ಆಹಾರ, ಉಡುಪುಗಳು, ಇಂಧನ ಸೇರಿದಂತೆ ಯೋಧರಿಗೆ ಬೇಕಾದ ಅಗತ್ಯ ವಸ್ತುಗಳನ್ನು ಈ ಯುದ್ಧವಿಮಾನಗಳು ಸಾಗಾಟ ಮಾಡಲಿವೆ’ ಎಂದು ರಕ್ಷಣಾ ಇಲಾಖೆ ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

‘ಅಗತ್ಯ ಸಾಮಗ್ರಿಗಳನ್ನು ಹೊತ್ತ ವಾಯುಪಡೆ ಮೊದಲ ವಿಮಾನವೊಂದು ವೆಸ್ಟರ್ನ್ ಏರ್‌ ಕಮಾಂಡ್‌ನ ಮುಂಚೂಣಿ ನೆಲೆಯೊಂದರಿಂದ ಎಲ್‌ಎಸಿಯತ್ತ ಪ್ರಯಾಣ ಬೆಳೆಸಿತು’ ಎಂದೂ ಹೇಳಿಕೆ ತಿಳಿಸಿದೆ.