ಭಾರತದಿಂದ ವಿದೇಶಕ್ಕೆ ಈವರೆಗೆ 56 ಲಕ್ಷ ಡೋಸ್ ಕೋವಿಡ್ ಲಸಿಕೆ ಉಡುಗೊರೆ

ನವದೆಹಲಿ: ಎರಡು ಕೋವಿಡ್ ಲಸಿಕೆಗಳ ಬಳಕೆಗೆ ಅನುಮೋದನೆ ನೀಡಿರುವ ಭಾರತವು ವಿದೇಶಗಳಿಕೆ 56 ಲಕ್ಷ ಡೋಸ್ ಲಸಿಕೆಯನ್ನು ಉಡುಗೊರೆಯಾಗಿ ಮತ್ತು 100 ಲಕ್ಷ ಡೋಸ್ ಲಸಿಕೆಗಳನ್ನು ವಾಣಿಜ್ಯ ಸರಬರಾಜು ಮಾಡಿದೆ ಎಂದು ವಿದೇಶಾಂಗ ಸಚಿವಾಲಯ ತಿಳಿಸಿದೆ.

ಮುಂಬರುವ ವಾರಗಳಲ್ಲಿ ಭಾರತದ ಲಸಿಕೆಗಳು ಕೆರಿಬಿಯನ್ ದೇಶಗಳು, ಪೆಸಿಫಿಕ್ ದ್ವೀಪ ರಾಷ್ಟ್ರಗಳು, ನಿಕರಾಗುವಾ, ಅಫ್ಘಾನಿಸ್ತಾನ ಮತ್ತು ಮಂಗೋಲಿಯಾಗೆ ಲಸಿಕೆ ತಲುಪಲಿವೆ ಎಂದು ಎಂಇಎ ವಕ್ತಾರ ಅನುರಾಗ್ ಶ್ರೀವಾಸ್ತವ ತಿಳಿಸಿದ್ದಾರೆ.

"ನಾವು ಈವರೆಗೆ ಭೂತಾನ್, ಮಾಲ್ಡೀವ್ಸ್, ಬಾಂಗ್ಲಾದೇಶ, ನೇಪಾಳ, ಮ್ಯಾನ್ಮಾರ್, ಮಾರಿಷಸ್, ಸೀಶೆಲ್ಸ್, ಶ್ರೀಲಂಕಾ, ಯುಎಇ, ಬ್ರೆಜಿಲ್, ಮೊರಾಕೊ, ಬಹ್ರೇನ್, ಒಮಾನ್, ಈಜಿಪ್ಟ್, ಅಲ್ಜೀರಿಯಾ, ಕುವೈತ್ ಮತ್ತು ದಕ್ಷಿಣ ಆಫ್ರಿಕಾಗಳಿಗೆ ಲಸಿಕೆಗಳನ್ನು ಪೂರೈಸಿದ್ದೇವೆ" ಎಂದು ಅವರು ಹೇಳಿದರು.

"ಅನುದಾನದ ಮೊತ್ತದಲ್ಲಿ 56 ಲಕ್ಷ ಡೋಸ್ ಮತ್ತು ವಾಣಿಜ್ಯ ಸರಬರಾಜು 100 ಲಕ್ಷ ಡೋಸ್ ಮಾಡಲಾಗಿದೆ". ಲಸಿಕೆಗಳ ಬಾಹ್ಯ ಸರಬರಾಜು ಲಭ್ಯತೆ ಮತ್ತು ದೇಶೀಯ ಅಗತ್ಯಗಳಿಗೆ ಅನುಗುಣವಾಗಿ ನಡೆಯುತ್ತಿರುವ ಪ್ರಕ್ರಿಯೆಯಾಗಿದೆ ಎಂದು ಶ್ರೀವಾಸ್ತವ ಹೇಳಿದರು.

"ಮುಂದಿನ ವಾರಗಳಲ್ಲಿ, ಭಾರತೀಯ ಲಸಿಕೆಗಳನ್ನು ಕ್ಯಾರಿಕೊಮ್ ದೇಶಗಳು (ಕೆರಿಬಿಯನ್), ಪೆಸಿಫಿಕ್ ದ್ವೀಪ ರಾಷ್ಟ್ರಗಳು, ನಿಕರಾಗುವಾ, ಅಫ್ಘಾನಿಸ್ತಾನ, ಮಂಗೋಲಿಯಾ ಇತ್ಯಾದಿ ದೇಶಗಳಿಗೆ ಸರಬರಾಜು ಮಾಡಲು ನಿರ್ಧರಿಸಲಾಗಿದೆ" ಎಂದು ಅವರು ಹೇಳಿದ್ದಾರೆ.

ಕೆರಿಬಿಯನ್ ಸಮುದಾಯ (ಕ್ಯಾರಿಕೊಮ್) 20 ದ್ವೀಪ ರಾಷ್ಟ್ರಗಳ ಗುಂಪಾಗಿದ್ದು, ಇದು ಸುಮಾರು 1.6 ಕೋಟಿ ಜನರ ನೆಲೆಯಾಗಿದೆ.

ಭೂತಾನ್, ಮಾಲ್ಡೀವ್ಸ್, ಬಾಂಗ್ಲಾದೇಶ, ನೇಪಾಳ, ಮ್ಯಾನ್ಮಾರ್, ಸೀಶೆಲ್ಸ್, ಶ್ರೀಲಂಕಾ, ಅಫ್ಘಾನಿಸ್ತಾನ ಮತ್ತು ಮಾರಿಷಸ್ ಸೇರಿದಂತೆ ಹಲವು ದೇಶಗಳಿಗೆ ಕೋವಿಡ್ -19 ಲಸಿಕೆಗಳನ್ನು ಅನುದಾನದ ನೆರವಿನ ಮೂಲಕ ಸರಬರಾಜು ಮಾಡಲಾಗುವುದು ಎಂದು ಜನವರಿ 19ರಂದು ಭಾರತ ಪ್ರಕಟಿಸಿತ್ತು.

ಭಾರತವು ವಿಶ್ವದ ಅತಿದೊಡ್ಡ ಔಷಧಿ ತಯಾರಕ ದೇಶಗಳಲ್ಲಿ ಒಂದಾಗಿದ್ದು, ಹಲವು ದೇಶಗಳು ಈಗಾಗಲೇ ಕೊರೊನಾ ಲಸಿಕೆಗಾಗಿ ಭಾರತವನ್ನು ಸಂಪರ್ಕಿಸಿವೆ.