ದೇಶದ ಆರ್ಥಿಕತೆಯಲ್ಲಿ ತಲಾ ಆದಾಯ ಕುಸಿತ: ರಾಹುಲ್‌ ಗಾಂಧಿ ಆಕ್ಷೇಪ

ನವದೆಹಲಿ(ಪಿಟಿಐ): ದೇಶದ ಆರ್ಥಿಕತೆ ವಿಚಾರಕ್ಕೆ ಸಂಬಂಧಿಸಿ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರು ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ದು, ಭಾರತೀಯರ ತಲಾ ಆದಾಯವು ಕಡಿಮೆಯಾಗುತ್ತಿದೆ. ಆದರೆ,ಕಾರ್ಯ ನೀತಿಯದಿವಾಳಿತಕ್ಕೆ ಸಿಲುಕಿರುವ ಸರ್ಕಾರದ ಬಳಿ ಸಮಸ್ಯೆಗಳಿಗೆ ಉತ್ತರವಿಲ್ಲ ಎಂದು ಟೀಕಿಸಿದ್ದಾರೆ.

ಈ ಸಂಬಂಧ ಸೋಮವಾರ ಫೇಸ್‌ಬುಕ್ ಪೋಸ್ಟ್ ಮಾಡಿರುವ ಅವರು, ‘ಭಾರತದ ಕುಟುಂಬಗಳು ಈಗಾಗಲೇ ಹಣದುಬ್ಬರ, ಉದ್ಯೋಗ ನಷ್ಟ ಅನುಭವಿಸುತ್ತಿದ್ದು, ಅವರ ತಲಾ ಆದಾಯವು 2 ವರ್ಷದ ಹಿಂದಿನದ್ದಕ್ಕಿಂತಲೂ ಕುಸಿತವಾಗಿದೆ. ಭಾರತೀಯರ ತಲಾ ಆದಾಯವು ₹94,270ನಿಂದ₹91,481ಗೆ ಇಳಿಕೆಯಾಗಿದೆ.ಮುಂದಿನ ದಿನಗಳಲ್ಲಿ ದೇಶದ ಆರ್ಥಿಕ ಸ್ಥಿತಿಯು ಮತ್ತಷ್ಟು ಹದಗೆಡಲಿದೆ’ ಎಂದು ಎಚ್ಚರಿಕೆ ನೀಡಿದರು.

ಆಹಾರ ವಸ್ತುಗಳು ಮತ್ತು ಪೆಟ್ರೋಲಿಯಂ ಉತ್ಪನ್ನಗಳ ಬೆಲೆ ಏರಿಕೆ ವಿಚಾರವಾಗಿ ಕೇಂದ್ರ ಸರ್ಕಾರದ ವಿರುದ್ಧ ಕಾಂಗ್ರೆಸ್ ನಿರಂತರ ವಾಗ್ದಾಳಿ ಮುಂದುವರಿಸಿದೆ.