ಕೇರಳದಲ್ಲಿ 21,445 ಹೊಸ ಪ್ರಕರಣಗಳು; ಸೋಂಕು ದೃಢ ಪ್ರಮಾಣ ಶೇ 14.73

ತಿರುವನಂತಪುರಂ: ದೇಶದಲ್ಲಿ ನಿತ್ಯ ದಾಖಲಾಗುತ್ತಿರುವ ಕೋವಿಡ್‌ ಪ್ರಕರಣಗಳಲ್ಲಿ ಅರ್ಧಕ್ಕಿಂತಲೂ ಹೆಚ್ಚು ಪ್ರಕರಣಗಳು ಕೇರಳದಿಂದಲೇ ವರದಿಯಾಗುತ್ತಿರುವುದು ಮುಂದುವರಿದಿದೆ. ಗುರುವಾರ 24 ಗಂಟೆಗಳ ಅಂತರದಲ್ಲಿ ಕೋವಿಡ್‌ ದೃಢಪಟ್ಟ 21,445 ಹೊಸ ಪ್ರಕರಣಗಳು ಕೇರಳದಲ್ಲಿ ದಾಖಲಾಗಿವೆ. ಇದೇ ಅವಧಿಯಲ್ಲಿ ಸೋಂಕಿನಿಂದ 160 ಮಂದಿ ಸಾವಿಗೀಡಾಗಿದ್ದಾರೆ.

ಒಟ್ಟು ಕೋವಿಡ್‌ ಪ್ರಕರಣಗಳ ಸಂಖ್ಯೆ 36.31 ಲಕ್ಷ ದಾಟಿದ್ದು, ಈ ಪೈಕಿ 18,280 ಮಂದಿ ಮೃತಪಟ್ಟಿದ್ದಾರೆ ಹಾಗೂ 34.36 ಲಕ್ಷಕ್ಕೂ ಹೆಚ್ಚು ಜನರು ಗುಣಮುಖರಾಗಿದ್ದಾರೆ. ಕಳೆದ 24 ಗಂಟೆಗಳಲ್ಲಿ 20,723 ಜನ ಸೋಂಕಿನಿಂದ ಚೇತರಿಸಿಕೊಂಡಿರುವುದಾಗಿ ಕೇರಳ ಸರ್ಕಾರದ ಪ್ರಕಟಣೆಯಿಂದ ತಿಳಿದು ಬಂದಿದೆ.

ರಾಜ್ಯದಲ್ಲಿ 1,76,518 ಪ್ರಕರಣಗಳು ಸಕ್ರಿಯವಾಗಿವೆ. 24 ಗಂಟೆಗಳಲ್ಲಿ 1,45,582 ಮಾದರಿಗಳಿಗೆ ಕೋವಿಡ್‌ ಪರೀಕ್ಷೆ ನಡೆಸಲಾಗಿದ್ದು, ಕೋವಿಡ್‌ ದೃಢ ಪ್ರಮಾಣ ಶೇ 14.73ರಷ್ಟಿದೆ.

ಮಲ್ಲಪುರಂ (3300), ಕೋಯಿಕೋಡ್‌ (2534), ತ್ರಿಶ್ಯೂರ್‌ (2465), ಎರ್ನಾಕುಲಂ (2425), ಪಾಲಕ್ಕಾಡ್‌ (2168), ಕೊಲ್ಲಂ (1339), ಕಣ್ಣೂರ್‌ (1338) ಜಿಲ್ಲೆಗಳಲ್ಲಿ ಹೆಚ್ಚು ಪ್ರಕರಣಗಳು ವರದಿಯಾಗುತ್ತಿವೆ. ಹೊಸ ಪ್ರಕರಣಗಳಲ್ಲಿ 111 ಜನ ಆರೋಗ್ಯ ಕಾರ್ಯಕರ್ತರು, 73 ಜನ ಹೊರ ರಾಜ್ಯದಿಂದ ಬಂದವರಾಗಿದ್ದರೆ, 20,316 ಮಂದಿಗೆ ಸೋಂಕು ಸಂಪರ್ಕಿತರಿಂದ ಹರಡಿರುವುದನ್ನು ಪತ್ತೆ ಮಾಡಲಾಗಿದೆ.

ಇದನ್ನೂ ಓದಿ: Covid-19 Karnataka Update: 1,857 ಹೊಸ ಪ್ರಕರಣ, 30 ಮಂದಿ ಸಾವು

ವಿವಿಧ ಜಿಲ್ಲೆಗಳಲ್ಲಿ 4,83,172 ಜನರ ಮೇಲೆ ನಿಗಾವಹಿಸಲಾಗಿದೆ. 4,54,689 ಜನರು ಮನೆಯಲ್ಲಿ ಅಥವಾ ಕೇಂದ್ರಗಳಲ್ಲಿ ಕ್ವಾರಂಟೈನ್‌ ಆಗಿದ್ದಾರೆ ಹಾಗೂ 28,483 ಜನರು ಆಸ್ಪತ್ರೆಗಳಲ್ಲಿದ್ದಾರೆ.