ಸೊಮಾಲಿಯಾ ಮಾದರಿ ದಾಳಿ ಭಾರತದಲ್ಲಿ ನಡೆಯದಿರಲಿ; ಮುಂಬೈ ಪೊಲೀಸರಿಗೆ ಸಂದೇಶ

ಮುಂಬೈ: ‘ಸೊಮಾಲಿಯಾದಲ್ಲಿ ನಡೆದ ಮಾದರಿಯ ದಾಳಿ ಭಾರತದಲ್ಲಿ ನಡೆಯುವುದನ್ನು ತಪ್ಪಿಸಲು ಮುನ್ನೆಚ್ಚರಿಕೆ ವಹಿಸಿ’ ಎಂಬ ಎಚ್ಚರಿಕೆ ಸಂದೇಶವೊಂದು ಮುಂಬೈನ ಸಂಚಾರ ಪೊಲೀಸರಿಗೆ ಅಂತರರಾಷ್ಟ್ರೀಯ ಮೊಬೈಲ್ ಸಂಖ್ಯೆಯಿಂದ ಬಂದಿದೆ.

ಶುಕ್ರವಾರ ಅಧಿಕಾರಿಯೊಬ್ಬರು ಈ ಮಾಹಿತಿ ನೀಡಿದ್ದಾರೆ. ಕಳೆದ ವಾರ ಸಂಚಾರ ಪೊಲೀಸರ ಸಹಾಯವಾಣಿ ಸಂಖ್ಯೆಗೆ ಈ ಕುರಿತು ಹಲವು ಸಂದೇಶಗಳು ಬಂದಿವೆ. ಇದರಲ್ಲಿ 26/11 ಮಾದರಿಯಲ್ಲಿ ದಾಳಿ ನಡೆಸುವುದೂ ಸೇರಿದೆ ಎಂದು ಅವರು ತಿಳಿಸಿದರು.

ಈಚೆಗೆ ಬಂದಿರುವ ಸಂದೇಶದಲ್ಲಿ ನಿರ್ದಿಷ್ಟ ಬೆದರಿಕೆ ಇಲ್ಲ. ಆದರೂ ಈ ಬಗ್ಗೆ ತನಿಖೆ ನಡೆದಿದೆ. ಸೊಮಾಲಿಯಾದ ರಾಜಧಾನಿ ಮೊಗದಿಶುವಿನ ಹಯಾತ್ ಹೋಟೆಲ್‌ ಮೇಲೆ ಉಗ್ರ ಸಂಘಟನೆ ಅಲ್‌ ಶಬಾಬ್‌ ಈಚೆಗೆ ದಾಳಿ ನಡೆಸಿತ್ತು. ಆದರೆ, ಈಗ ಪೊಲೀಸ್‌ ಸಹಾಯವಾಣಿಗೆ ಬಂದಿರುವ ಎಚ್ಚರಿಕೆ ಸಂದೇಶದಲ್ಲಿ ದಾಳಿಯ ಯಾವ ಘಟನೆ ಉಲ್ಲೇಖಿಸಲಾಗಿದೆ ಎಂಬುದು ಸ್ಪಷ್ಟವಾಗಿಲ್ಲ.