ಮಹಾರಾಷ್ಟ್ರ: 11 ನಕ್ಸಲರ ಶರಣಾಗತಿ

ಮುಂಬೈ: ಮಹಾರಾಷ್ಟ್ರದ ಗೊಂದಿಯಾ ಜಿಲ್ಲೆಯಲ್ಲಿ ನಾಲ್ವರು ಮಹಿಳೆಯರು ಸೇರಿದಂತೆ 11 ನಕ್ಸಲರು ಶಸ್ತ್ರಾಸ್ತ್ರ ತ್ಯಜಿಸಿ ಶರಣಾಗಿದ್ದಾರೆ. ಈ ವರ್ಷ ರಾಜ್ಯದಲ್ಲಿ ನಡೆದ ನಾಲ್ಕನೇ ಅತಿದೊಡ್ಡ ನಕ್ಸಲರ ಶರಣಾಗತಿ ಇದಾಗಿದೆ. ಇವರೆಲ್ಲರ ಮಾಹಿತಿ ನೀಡಿದವರಿಗೆ ಒಟ್ಟು ₹89 ಲಕ್ಷ ಬಹುಮಾನ ಘೋಷಣೆಯಾಗಿತ್ತು.

ತೆಲಂಗಾಣ ಮತ್ತು ಛತ್ತೀಸಗಢದಲ್ಲಿ ಪ್ರಭಾವವಿರುವ ಗಡಚಿರೋಲಿ ಪ್ರದೇಶದ ‌ಪ್ರಮುಖ ನಕ್ಸಲ್ ನಾಯಕ ಅನಂತ್ ಅಲಿಯಾಸ್ ವಿನೋದ್ ಸಯ್ಯನ (40) ಈ ಗುಂಪಿನಲ್ಲೇ ಶರಣಾಗಿದ್ದು, ಈ ಮೂಲಕ ಪ್ರದೇಶದ ನಕ್ಸಲರಿಗೆ ದೊಡ್ಡ ಹಿನ್ನಡೆಯಾಗಿದೆ. ತೆಲಂಗಾಣದ ಕರೀಂನಗರ ಮೂಲದ ಅವರ ಮಾಹಿತಿ ನೀಡಿದವರಿಗೆ ₹25 ಲಕ್ಷ ಬಹುಮಾನ ಘೋಷಿಸಲಾಗಿತ್ತು.

ಶರಣಾದ ನಕ್ಸಲರು ನಿಷೇಧಿತ ಸಿಪಿಐ(ಮಾವೋವಾದಿ) ‘ದರೆಕಸ ದಳ’ಕ್ಕೆ ಸೇರಿದವರು ಎಂದು ಗಡಚಿರೋಲಿ ವಲಯದ ಡಿಐಜಿ ಅಂಕಿತ್ ಗೋಯಲ್ ಹೇಳಿದ್ದಾರೆ. ಮಹಾರಾಷ್ಟ್ರ–ಮಧ್ಯಪ್ರದೇಶ–ಛತ್ತೀಸಗಢ ವಿಶೇಷ ವಲಯ ಸಮಿತಿಯಲ್ಲಿ ದರೆಕಸ ದಳ ಅತ್ಯಂತ ಸಕ್ರಿಯ ನಕ್ಸಲ್ ದಳವಾಗಿದೆ.