ಶಬರಿಮಲೆ: ಮೊದಲ ದಿನ ₹3.30 ಕೋಟಿ ಆದಾಯ

ಶಬರಿಮಲೆ: ಶಬರಿಮಲೆಗೆ ಆಗಮಿಸುತ್ತಿರುವ ಭಕ್ತರ ಸಂಖ್ಯೆ ದಿನೇ ದಿನೆ ಏರಿಕೆಯಾಗುತ್ತಿದ್ದು,ಕಳೆದ ಮೂರು ದಿನದಲ್ಲಿ 70 ಸಾವಿರಕ್ಕೂ ಅಧಿಕ ಭಕ್ತರು ಅಯ್ಯಪ್ಪ ಸ್ವಾಮಿಯ ದರ್ಶನ ಪಡೆದಿದ್ದಾರೆ. ಶನಿವಾರ ಒಂದೇ ದಿನದಲ್ಲಿ ₹3.30 ಕೋಟಿಗೂ ಅಧಿಕ ಆದಾಯ ಸಂಗ್ರಹವಾಗಿದೆ.

ಕಳೆದ ವರ್ಷ ಮೊದಲ ದಿನ ₹1.28 ಕೋಟಿ ಆದಾಯ ಸಂಗ್ರಹವಾಗಿತ್ತು. ‘ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಆದಾಯ ಶೇ 50 ಏರಿಕೆಯಾಗಿದೆ’ ಎಂದು ತಿರುವಂಕೂರ್‌ ದೇವಸ್ಥಾನ ಮಂಡಳಿಯ ಅಧ್ಯಕ್ಷ ಎನ್‌.ವಾಸು ಸೋಮವಾರ ತಿಳಿಸಿದರು.

ಈ ವರ್ಷ ಭಕ್ತರ ಸಂಖ್ಯೆ ಹೆಚ್ಚಿದ್ದು,ದೇವಸ್ಥಾನ ಪ್ರದೇಶದಲ್ಲಿಸೂಕ್ತ ಮೂಲ ಸೌಲಭ್ಯದ ಕೊರತೆಯಿದೆ ಎಂದು ಭಕ್ತರು ಆರೋಪಿಸಿದ್ದಾರೆ. ಕಳೆದ ವರ್ಷ ಇದೇ ಸಮಯದಲ್ಲಿ ಶಬರಿಮಲೆಯಲ್ಲಿ ಪ್ರತಿಭಟನೆಗಳು ನಡೆದು, ಭಕ್ತರಿಗೆ ಅನನುಕೂಲವಾಗಿತ್ತು. ‘ಈ ಬಾರಿ ಶಾಂತಿಯುತವಾದ ವಾತಾವರಣವಿದ್ದು, ಯಾವುದೇ ನಿರ್ಬಂಧಗಳನ್ನೂ ಹೇರುತ್ತಿಲ್ಲ’ ಎಂದು ಭಕ್ತರೊಬ್ಬರು ಹೇಳಿದರು.