ಇರಾನ್‌: ನಟಾನ್ಜ್‌ ಪರಮಾಣು ಕೇಂದ್ರದಲ್ಲಿ ಹಠಾತ್‌ ವಿದ್ಯುತ್ ಸ್ಥಗಿತ

ದುಬೈ: ಇರಾನ್‌ನ ನಟಾನ್ಜ್‌ ಪರಮಾಣು ಕೇಂದ್ರದಲ್ಲಿ ಭಾನುವಾರ ಹಠಾತ್ ಆಗಿ ವಿದ್ಯುತ್ ಪೂರೈಕೆ ಸ್ಥಗಿತಗೊಂಡಿದೆ. ಯುರೇನಿಯಂ ಉತ್ಪಾದನೆ ಪ್ರಕ್ರಿಯೆಯ ವೇಗ ಇನ್ನಷ್ಟು ಹೆಚ್ಚಿಸಲು ಸುಧಾರಿತ ಸೆಂಟ್ರಿಫ್ಯೂಜ್‌ಗಳ ಕಾರ್ಯಾರಂಭ ಮಾಡಿದ ಬೆನ್ನಲ್ಲೇ ಈ ಘಟನೆ ನಡೆದಿದೆ.

‘ವಿದ್ಯುತ್ ಸ್ಥಗಿತಕ್ಕೆ ಸೂಕ್ತ ಕಾರಣ ತಿಳಿದುಬಂದಿಲ್ಲ. ಪರಿಶೀಲನೆ ನಡೆಸಲಾಗುತ್ತಿದೆ. ಅದೃಷ್ಟವಶಾತ್‌ ಯಾವುದೇ ಹಾನಿ ಸಂಭವಿಸಿಲ್ಲ’ ಎಂದು ಇರಾನ್‌ ನಾಗರಿಕ ಪರಮಾಣು ಕಾರ್ಯಕ್ರಮದ ವಕ್ತಾರ ಬೆಹ್ರೌಜ್ ಕಮಲ್ವಾಂಡಿ ತಿಳಿಸಿದ್ದಾರೆ.

ಸೈಬರ್‌ ದಾಳಿಯೇ ವಿದ್ಯುತ್‌ ಪೂರೈಕೆ ಸ್ಥಗಿತಕ್ಕೆ ಕಾರಣ ಎಂದು ಇಸ್ರೇಲ್‌ ಮಾಧ್ಯಮಗಳು ವರದಿ ಮಾಡಿವೆ.