ಅತ್ಯಾಚಾರ: ಟಿಕೆಟ್‌ ಪರಿಶೀಲನಾ ಅಧಿಕಾರಿ ಬಂಧನ

ಸಂಭಲ್, ಉತ್ತರ ಪ್ರದೇಶ: ಸುಬೇದಾರ್‌ಗಂಜ್ ಎಕ್ಸ್‌ಪ್ರೆಸ್‌ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದ ಮಹಿಳೆ ಮೇಲೆ ಅತ್ಯಾಚಾರ ಎಸಗಿದ ಆರೋಪದಡಿ ಟಿಕೆಟ್‌ ಪರಿಶೀಲನಾ ಅಧಿಕಾರಿಯನ್ನು (ಟಿಟಿಇ) ಬಂಧಿಸಲಾಗಿದೆ ಎಂದು ರೈಲ್ವೆ ಪೊಲೀಸರು ಭಾನುವಾರ ತಿಳಿಸಿದ್ದಾರೆ.

ರಾಜು ಸಿಂಗ್‌ ಬಂಧಿತ ಅಧಿಕಾರಿ. ಮತ್ತೊಬ್ಬ ಆರೋಪಿ ಪರಾರಿಯಾಗಿದ್ದು, ಪತ್ತೆಗಾಗಿ ಕಾರ್ಯಾಚರಣೆ ನಡೆಸಲಾಗುತ್ತಿದೆ ಎಂದು ಚಂದೌಸಿ ರೈಲು ನಿಲ್ದಾಣದ ಪೊಲೀಸ್‌ ಅಧಿಕಾರಿ ಕೆ.ಎನ್‌.ಸಿಂಗ್‌ ತಿಳಿಸಿದ್ದಾರೆ.

‘ಪ್ರಥಮ ದರ್ಜೆ ಎಸಿ ಕೋಚ್‌ನಲ್ಲಿ ಸೀಟು ದೊರಕಿಸಿಕೊಡುವುದಾಗಿ ಟಿಟಿಇ ಹಾಗೂ ಸಹ ಪ್ರಯಾಣಿಕನೊಬ್ಬ ಹೇಳಿ, ನನ್ನ ಮೇಲೆ ಅತ್ಯಾಚಾರ ಎಸಗಿದರು ಎಂಬುದಾಗಿ ಮಹಿಳೆ ದೂರು ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದೇವೆ’ ಎಂದು ತಿಳಿಸಿದ್ದಾರೆ.