ಪುದುಚೇರಿ: ಧರಣಿ ಕೈಬಿಟ್ಟ ಸಚಿವ

ಪುದುಚೇರಿ: ಮುಖ್ಯಮಂತ್ರಿ ವಿ.ನಾರಾಯಣ ಸ್ವಾಮಿ ಅವರ ಮನವೊಲಿಕೆಯ ಹಿನ್ನೆಲೆಯಲ್ಲಿ ಕಲ್ಯಾಣ ಸಚಿವ ಎಂ. ಕಂದಸಾಮಿ ಅವರು ಮಂಗಳವಾರ ಧರಣಿ ಕೈಬಿಟ್ಟಿದ್ದಾರೆ.

ತಮ್ಮ ಇಲಾಖೆಗೆ ಸಂಬಂಧಿಸಿದ ಅಭಿವೃದ್ಧಿ ಯೋಜನೆಗಳ ಕಡತಗಳಿಗೆ ಅನುಮೋದನೆ ನೀಡಲು ಲೆಫ್ಟಿನೆಂಟ್‌ ಗವರ್ನರ್‌ ಕಿರಣ್‌ ಬೇಡಿ ವಿಳಂಬ ಮಾಡುತ್ತಿದ್ದಾರೆ ಎಂದು ಆರೋಪಿಸಿ ಕಂದಸಾಮಿ ಅವರು ಇದೇ ತಿಂಗಳ 10ರಂದು ಧರಣಿ ಆರಂಭಿಸಿದ್ದರು.

ಧರಣಿ ನಿರತ ಸ್ಥಳದಲ್ಲಿ ಕಂದಸಾಮಿ ಅವರನ್ನು ಭೇಟಿ ಮಾಡಿದ ನಾರಾಯಣ ಸ್ವಾಮಿ ಅವರು ಇದೇ 21 ಇಲ್ಲವೇ 22ರಂದು ರಾಷ್ಟ್ರಪತಿ ಬಳಿ ಸಚಿವರ ನಿಯೋಗ ಕರೆದೊಯ್ಯಲಾಗುತ್ತದೆ. ಈಗ ಉದ್ಭವಿಸಿರುವ ಬಿಕ್ಕಟ್ಟು ಶಮನಗೊಳಿಸಲು ಪ್ರಯತ್ನಿಸಬೇಕೆಂದು ಅವರಿಗೆ ಮನವಿ ಮಾಡಲು ನಿರ್ಧರಿಸಲಾಗಿದೆ ಎಂದು ತಿಳಿಸಿದರು. ಹೀಗಾಗಿ ಸಚಿವರು ಧರಣಿ ಅಂತ್ಯಗೊಳಿಸಿದರು.