ಅಕಾಡೆಮಿ ಜಾಲತಾಣ ಅನಾವರಣ

ಬೆಂಗಳೂರು:  ಕರ್ನಾಟಕ ಸಂಗೀತ ನೃತ್ಯ ಅಕಾಡೆಮಿಯ ಜಾಲತಾಣ (www. karnatakasangeetanrityaacademy.org) ವನ್ನು ನಗರದ ಕನ್ನಡಭವನದಲ್ಲಿರುವ ಅಕಾಡೆಮಿ ಕಾರ್ಯಾಲಯದಲ್ಲಿ ಸೋಮವಾರ ಬಿಡುಗಡೆ  ಮಾಡಲಾಯಿತು.

`ಕರ್ನಾಟಕ ಸಂಗೀತ, ಹಿಂದೂಸ್ತಾನಿ ಸಂಗೀತ, ಸುಗಮ ಸಂಗೀತ, ನೃತ್ಯ, ಕಥಾಕೀರ್ತನೆ ಹಾಗೂ ಗಮಕ ಕಲೆಗಳಿಗೆ ಸಂಬಂಧಿಸಿದಂತೆ ಅಕಾಡೆಮಿ ನಡೆಸಿದ ಚಟುವಟಿಕೆಗಳನ್ನು ಛಾಯಾಚಿತ್ರ, ವಿಡಿಯೋ ಚಿತ್ರ ಹಾಗೂ ಅಕ್ಷರರೂಪದಲ್ಲಿ ದಾಖಲಿಸಲಾಗಿದೆ. ಇದೀಗ ವೆಬ್‌ಸೈಟ್ ಮೂಲಕ ಅಕಾಡೆಮಿಯ ಚಟುವಟಿಕೆಗಳನ್ನು ಹೆಚ್ಚು ವ್ಯಾಪಕಗೊಳಿಸಲು ಉದ್ದೇಶಿಸಲಾಗಿದೆ~ ಎಂದು ಅಕಾಡೆಮಿಯ ಅಧ್ಯಕ್ಷೆ ವೈಜಯಂತಿ ಕಾಶಿ ತಿಳಿಸಿದರು.

`ಹೊಸ ತಂತ್ರಜ್ಞಾನಗಳನ್ನು ಬಳಸಿ ಕಲಾವಿದರ ಸಾಧನೆಗಳ ದಾಖಲೆ ಮಾಡಬೇಕಿದೆ. ಈ ನಿಟ್ಟಿನಲ್ಲಿ ರಾಜ್ಯದ ನಾನಾಭಾಗದ ಕಲಾವಿದರನ್ನು ಗುರುತಿಸಿ ವೆಬ್‌ಸೈಟ್‌ನಲ್ಲಿ ಅವರ ಪರಿಚಯ ಹಾಕಲಾಗುವುದು. ಎಲ್ಲ ಕಲಾ ಪ್ರಕಾರಗಳಿಗೂ ಸಾಮಾಜಿಕ ನ್ಯಾಯ ಒದಗಿಸುವುದು ಅಕಾಡೆಮಿಯ ಗುರಿ. ಯುವ ಕಲಾವಿದರಿಗೆ ಹೆಚ್ಚಿನ ಪ್ರೋತ್ಸಾಹ ನೀಡಲಾಗುವುದು~ ಎಂದು ಅವರು ಮಾಹಿತಿ ನೀಡಿದರು.