ಮೊಸಳೆ ದಾಳಿ: ಕೃಷಿ ಕಾರ್ಮಿಕ ನಾಪತ್ತೆ

ಔರಾದ್‌: ಇಲ್ಲಿಗೆ ಸಮೀಪದ ಮಾಂಜ್ರಾ ನದಿಯಲ್ಲಿ ಕೃಷಿ ಕಾರ್ಮಿಕನನ್ನು ಮೊಸಳೆ ನೀರಿನೊಳಗೆ ಎಳೆದುಕೊಂಡು ಹೋದ ಘಟನೆ ನಡೆದಿದೆ.

ಖಾಜಾ ಮೈನುದ್ದೀನ್ (25) ಮೊಸಳೆ ದಾಳಿಗೆ ತುತ್ತಾದ ವ್ಯಕ್ತಿ. ಅವರು ಹೆಡಗಾಪುರ ಜಮೀನು­ದಾರರೊಬ್ಬರ ಬಳಿ ಕೆಲಸಕ್ಕಿದ್ದು ಶನಿವಾರ ಮಧ್ಯಾಹ್ನ ಎತ್ತುಗಳನ್ನು ತೊಳೆ­ಯಲು ಪಕ್ಕದ ಮಾಂಜ್ರಾ ನದಿಗೆ ಇಳಿದಿದ್ದರು. ಏಕಾಏಕಿ ಮೊಸಳೆ ಬಂದು ಅವರನ್ನು ನೀರಿಗೆ ಎಳೆದುಕೊಂಡು ಹೋಗಿದೆ ಎಂದು ಸ್ಥಳೀಯರು ಹೇಳಿದ್ದಾರೆ ಎಂದು ವಲಯ ಅರಣ್ಯ ಅಧಿಕಾರಿ ದೇವೇಂದ್ರಪ್ಪ ತಿಳಿಸಿದ್ದಾರೆ.

ಅವರ ಬಟ್ಟೆ ಮತ್ತು ಷೂ ನದಿಯ ದಂಡೆ ಮೇಲೆ ಇವೆ. ಅರಣ್ಯ ಇಲಾಖೆ ಸಿಬ್ಬಂದಿ  ಮತ್ತು ಅಗ್ನಿಶಾಮಕ ದಳ­ದವರು ಭಾನುವಾರ ಇಡೀ ದಿನ ಶೋಧ ಕಾರ್ಯಾಚರಣೆ ನಡೆಸಿದರೂ ಅವರು ಪತ್ತೆಯಾಗಿಲ್ಲ. ನಾಳೆಯೂ  ಶೋಧ ಕಾರ್ಯಾಚರಣೆ ಮುಂದು­ವರಿಯಲಿದೆ ಎಂದು ದೇವೇಂದ್ರಪ್ಪ ತಿಳಿಸಿದ್ದಾರೆ.