ರೈತ ಸಂಘದಲ್ಲಿ ಬಂಡಾಯ ಸ್ಫೋಟ: ಭಿನ್ನರ ಸಭೆ

ಶ್ರೀರಂಗಪಟ್ಟಣ: ಪ್ರಸಕ್ತ ಲೋಕಸಭೆ ಚುನಾ­ವಣೆ­ಯಲ್ಲಿ ರೈತ ಮುಖಂಡರು ಕೈಗೊಂಡಿ­ರುವ ರಾಜ­ಕೀಯ ತೀರ್ಮಾ­ನ­ಗಳು, ತಾಲ್ಲೂಕು ಘಟಕದ ಪದಾ­ಧಿ­­ಕಾರಿಗಳ ಧೋರಣೆಯನ್ನು ವಿರೋ­­ಧಿಸಿ ಸಂಘದ ಭಿನ್ನಮತೀಯರು ಗುರುವಾರ ಪ್ರತ್ಯೇಕ ಸಭೆ ನಡೆ­ಸುವ ಮೂಲಕ ಬಂಡಾಯದ ಬಾವುಟ ಹಾರಿಸಿದ್ದಾರೆ.

ರೈತ ಸಂಘದ ತಾಲ್ಲೂಕು ಘಟಕದ ಮಾಜಿ ಅಧ್ಯಕ್ಷ ಮೇಳಾ­ಪುರ ಸ್ವಾಮಿ­ಗೌಡ, ಪ್ರಧಾನ ಕಾರ್ಯದರ್ಶಿ ಡಿ.ಎಸ್‌.­ ­ಚಂದ್ರಶೇಖರ್‌, ತಾಲ್ಲೂಕು ಪಂಚಾ­ಯಿತಿ ಮಾಜಿ ಸದಸ್ಯ ಮಂಜೇಶ್‌­ಗೌಡ, ಖಜಾಂಚಿ ನಾಗೇಂದ್ರ­ಸ್ವಾಮಿ, ಕೆ. ಶೆಟ್ಟಹಳ್ಳಿ ಶ್ರೀಕಂಠಯ್ಯ, ತಡಗವಾಡಿ ದೇವೇಗೌಡ, ಬನ್ನಹಳ್ಳಿ ಚನ್ನೇಗೌಡ, ಅರಕೆರೆ ಪುಟ್ಟಸ್ವಾಮಿ ಇತರರು ಇಲ್ಲಿನ ಲಕ್ಷ್ಮೀನರಸಿಂಹಸ್ವಾಮಿ ದೇವಾಲಯ ಆವರಣದಲ್ಲಿ ಪ್ರತ್ಯೇಕ ಸಭೆ ನಡೆಸಿದರು.

ರೈತ ಸಂಘದ ಮುಖಂಡರು ತೆಗೆದು­ಕೊಳ್ಳು­ತ್ತಿರುವ ರಾಜಕೀಯ ತೀರ್ಮಾನ­ಗಳು ಸಂಘದ ಮೂಲ ಆಶಯಕ್ಕೆ ವಿರು­ದ್ಧ­ವಾಗಿವೆ. ಪ್ರೊ.ಎಂ.ಡಿ. ನಂ­ಜುಂ­ಡ­­­ಸ್ವಾಮಿ, ಸುಂದರೇಶ್‌, ರುದ್ರಪ್ಪ ಅವರಂತಹ ಹೋರಾಟ­ಗಾ­ರ­ರು ರೂಪಿ­ಸಿದ ಸಂವಿಧಾನವನ್ನು ಗಾ­ಳಿಗೆ ತೂರ­ಲಾ­ಗು­ತ್ತಿದೆ. ಅನುಕೂಲ­ಸಿಂಧು ರಾಜಕೀಯ ನಿರ್ಣ­ಯ­­ಗಳನ್ನು ತೆಗೆದುಕೊಳ್ಳ­ಲಾಗು­ತ್ತಿದೆ ಎಂದು ಮೇಳಾಪುರ ಸ್ವಾಮಿಗೌಡ ಅಸಮಾಧಾನ ವ್ಯಕ್ತಪಡಿಸಿದರು.

ಲೋಕಸಭೆ ಉಪ ಚುನಾವಣೆ ಮತ್ತು ಪ್ರಸಕ್ತ ಚುನಾವಣೆಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿಯನ್ನು ಬೆಂಬಲಿ­ಸುವ ಬಗ್ಗೆ ಕಾರ್ಯಕರ್ತರ ಅಭಿಪ್ರಾಯ ಕೇಳದೆ ಮುಖಂಡರು ಏಕಮುಖ ತೀರ್ಮಾನ ಕೈಗೊಂಡಿದ್ದಾರೆ. ಈ ಹಿಂದೆ ಯಡಿ­ಯೂರಪ್ಪ ಅವರು ಮೈಸೂರಿ­ನಿಂದ ಬೆಂಗಳೂರಿಗೆ ಪಾದಯಾತ್ರೆ ನಡೆ­ಸಿದ ಸಂದರ್ಭದಲ್ಲಿ ರಾಜ್ಯ ಸಮಿತಿಗೆ ವಿರುದ್ಧವಾಗಿ ಅವರಿಗೆ ಬೆಂಬಲ ನೀಡಿ­ದ್ದಾರೆ.

ರೈತ ಸಂಘದಲ್ಲಿ ಸದ್ಯ ಆಂತರಿಕ ಪ್ರಜಾಪ್ರಭುತ್ವ ಇಲ್ಲದೇ ಇರುವುದರಿಂದ ಸಂಘದ ಮೂಲ ಆಶಯದಂತೆ ರಾಜಕೀಯ ಮುಕ್ತವಾದ ಸಂಘಟನೆ­ಯನ್ನು ರೂಪಿಸಲು ಸಭೆ ನಡೆಸ­ಲಾಗು­ತ್ತಿದೆ. ಇನ್ನೆರಡು ದಿನಗಳಲ್ಲಿ ಎಲ್ಲ ತಾಲ್ಲೂಕು­­ಗಳ ಅತೃಪ್ತರ ಸಭೆಯನ್ನು ಮಂಡ್ಯದಲ್ಲಿ ನಡೆಸಲಾಗುವುದು. ಅಗತ್ಯಬಿದ್ದರೆ ಪ್ರತ್ಯೇಕ ಸಂಘವನ್ನು ಅಸ್ತಿತ್ವಕ್ಕೆ ತರಲಾಗುವುದು ಎಂದು ತಾಲ್ಲೂಕು ಪಂಚಾಯಿತಿ ಮಾಜಿ ಸದಸ್ಯ ಮಂಜೇಶ್‌ಗೌಡ ತಿಳಿಸಿದರು.

ನಾಗೇಂದ್ರ­ಸ್ವಾಮಿ ಖಂಡನಾ ನಿರ್ಣಯ ಮಂಡಿಸಿ­ದರು. ಟಿ.ಸಿ. ದೇವೇಗೌಡ, ದೊಡ್ಡ­ಪಾಳ್ಯ ಚಂದ್ರು, ಮಹೇಶ್‌, ಜಗದೀಶ್‌, ಕೆ.ಶೆಟ್ಟಹಳ್ಳಿ ಶಿವರಾಂ, ಸಿದ್ದರಾಮು, ಬಲ್ಲೇನಹಳ್ಳಿ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ತಮ್ಮಣ್ಣೇಗೌಡ, ಗ್ರಾಮ ಪಂಚಾಯಿತಿ ಸದಸ್ಯ ಮಲ್ಲೇಗೌಡ ಸಭೆಯಲ್ಲಿ ಭಾಗವಹಿಸಿದ್ದರು.