ಸಂತಸ, ಸಂಭ್ರಮ: ಸಾವಿನಲ್ಲಿ ಅಂತ್ಯ

ಸವದತ್ತಿ (ಬೆಳಗಾವಿ): ಬೆಳಿಗ್ಗೆ ಸಂತಸ, ಸಂಭ್ರಮ. ಸಂಜೆ ನೀರವ ಮೌನ. ಇದು ಸವದತ್ತಿಯ ಶತಾಯುಷಿ ಅಡಿವೆಮ್ಮತಾಯಿ ಹಿರೇಮಠ ಅವರ ಮನೆಯಲ್ಲಿ ಮಂಗಳವಾರ ಕಂಡು ಬಂದ ದೃಶ್ಯ.

ಬೆಳಿಗ್ಗೆ 110ನೇ ಜನ್ಮದಿನ ಆಚರಿಸಿಕೊಂಡಿದ್ದ ಅವರು ಸಂಜೆ 4 ಗಂಟೆ ಸುಮಾರಿಗೆ ಇಹಲೋಕ ತ್ಯಜಿಸಿದ್ದರಿಂದ ಜನ್ಮ ದಿನದ ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಬಂಧು-ಬಳಗ ಆಘಾತಕ್ಕೊಳಗಾದರು. ಅಡಿವೆಮ್ಮತಾಯಿ ಅವರಿಗೆ ಒಬ್ಬ ಪುತ್ರ, ರಾಷ್ಟ್ರಪ್ರಶಸ್ತಿ ಪುರಸ್ಕೃತ ಶಿಕ್ಷಕಿ ಭಾಗೀರಥಿಬಾಯಿ ಸೇರಿ ಐವರು ಪುತ್ರಿಯರು ಇದ್ದಾರೆ.

ಅಪ್ಪಟ ಜಾನಪದ ಹಾಡುಗಾರ್ತಿಯಾಗಿದ್ದ ಅಡಿವೆಮ್ಮತಾಯಿ ಇಳಿ ವಯಸ್ಸಿನಲ್ಲೂ ಬಡ, ನಿರ್ಗತಿಕರ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದರು.