ಹಿಂದೂಪುರ- ಬೆಂಗಳೂರು ಪ್ಯಾಸೆಂಜರ್‌ ಬೋಗಿ ಕಡಿತ, ಪ್ರಯಾಣಿಕರ ಪ್ರತಿಭಟನೆ

ಬೆಂಗಳೂರು: ಹಿಂದೂಪುರ- ಬೆಂಗಳೂರು ಪ್ಯಾಸೆಂಜರ್‌ ರೈಲಿನ ಬೋಗಿ ಸಂಖ್ಯೆಯಲ್ಲಿ ಕಡಿತ ಖಂಡಿಸಿ ಪ್ರಯಾಣಿಕರು ಸೋಮವಾರ ಅರ್ಧಗಂಟೆಗೂ ಹೆಚ್ಚುಕಾಲ ರೈಲುತಡೆ ನಡೆಸಿದರು.

‘ಎಲೆಕ್ಟ್ರಿಕ್ ಎಂಜಿನ್‌ ಇದ್ದ ಹಿಂದೂಪುರ- ಬೆಂಗಳೂರು ಪ್ಯಾಸೆಂಜರ್‌ ರೈಲಿಗೆ ಈ ಹಿಂದೆ 16 ಬೋಗಿಗಳು ಇರುತ್ತಿದ್ದವು. ಕಳೆದ ಶುಕ್ರವಾರದಿಂದ ರೈಲನ್ನು ಮೆಮು ಆಗಿ ಪರಿವರ್ತಿಸಲಾಗಿದ್ದು ಕೇವಲ ಬೋಗಿಗಳ ಸಂಖ್ಯೆಯನ್ನು 10ಕ್ಕೆ ಇಳಿಸಲಾಗಿದೆ. ರೈಲಿನೊಳಗೆ ಹೆಜ್ಜೆ ಇಡಲೂ ಸಾಧ್ಯವಾಗದಷ್ಟು ಜನರು ತುಂಬಿರುತ್ತಾರೆ’ ಎಂದು ಪ್ರಯಾಣಿಕರು ಹರಿಹಾಯ್ದರು.

‘ಹಿಂದೂಪುರ ಪ್ಯಾಸೆಂಜರ್ ಬೆಳಿಗ್ಗೆ 9:30ಕ್ಕೆ ನಗರ ರೈಲು ನಿಲ್ದಾಣ ತಲುಪಬೇಕು. ಆದರೆ ಈಚೆಗೆ ಇದು 10 ಗಂಟೆಗೆ ಮೊದಲು ಬರುವುದೇ ಅಪರೂಪ ಎಂಬಂತೆ ಆಗಿದೆ. ಕೆಲವೊಮ್ಮೆ 11 ಗಂಟೆಗೆ ಬಂದ ನಿದರ್ಶನಗಳೂ ಇವೆ. ಕಚೇರಿ ಕೆಲಸಕ್ಕೆ ಹೋಗುವವರಿಗೆ ಇದರಿಂದ ತೊಂದರೆಯಾಗಿದೆ’ ಎಂದು ಅನೇಕರು ಅಲವತ್ತುಕೊಂಡರು.