₹200 ಕೋಟಿ ಹೂಡಿಕೆಗೆ ಬೆಸ್ಟೆಕ್ ಆಸಕ್ತಿ: ಎಂ‌.ಬಿ. ಪಾಟೀಲ

ಬೆಂಗಳೂರು: ತೈವಾನ್‌ನ ಎಲೆಕ್ಟ್ರಾನಿಕ್ಸ್‌ ಬಿಡಿಭಾಗಗಳ ತಯಾರಿಕಾ ಕಂಪನಿ ಬೆಸ್ಟೆಕ್‌ ಪವರ್‌ ಎಲೆಕ್ಟ್ರಾನಿಕ್ಸ್‌, ರಾಜ್ಯದಲ್ಲಿ ₹200 ಕೋಟಿ ಬಂಡವಾಳ ಹೂಡಲು ಆಸಕ್ತಿ ತೋರಿದೆ ಎಂದು ಕೈಗಾರಿಕಾ ಸಚಿವ ಎಂ.ಬಿ. ಪಾಟೀಲ ಹೇಳಿದರು.

ಬೆಸ್ಟೆಕ್‌ ಉದ್ಯಮ ಸಮೂಹದ ಅಧ್ಯಕ್ಷ ಮೈಕ್‌ ಚೆನ್‌ ಮತ್ತು ಉಪಾಧ್ಯಕ್ಷೆ ತೆರೇಸಾ ಡಾಂಗ್ ಜತೆಗೆ ನಗರದಲ್ಲಿ ಮಂಗಳವಾರ ಸಚಿವರು ಸಭೆ ನಡೆಸಿದರು.

ಸಭೆಯ ನಂತರ ಮಾತನಾಡಿದ ಅವರು, ‘ಕಂಪನಿಯು ಬೆಂಗಳೂರು ಸುತ್ತಮುತ್ತಲಿನ ಪ್ರದೇಶದಲ್ಲಿ ಕಾರ್ಖಾನೆ ಸ್ಥಾಪಿಸಲು ಆಸಕ್ತಿ ತೋರಿಸಿದೆ. ಇದಕ್ಕೆ ರಾಜ್ಯ ಸರ್ಕಾರವು ಎಲ್ಲಾ ರೀತಿಯ ಸಹಕಾರ ನೀಡಲಿದೆ’ ಎಂದರು.

‘ಮೂಲಸೌಕರ್ಯ ಕಲ್ಪಿಸಿದ ಮೂರು ವರ್ಷಗಳಲ್ಲಿ ಕಂಪನಿಯು ಹಂತ ಹಂತವಾಗಿ ಬಂಡವಾಳ ಹೂಡಲಿದೆ. ಕಂಪನಿಯು 5,000 ಉದ್ಯೋಗಗಳನ್ನು ಸೃಷ್ಟಿಸಲಿದೆ’ ಎಂದರು.

ಕಂಪನಿಯು ಉತ್ತಮ ಗುಣಮಟ್ಟದ ಸಿ–ಪಿನ್‌, ಇ.ವಿ. ಮತ್ತು ಲ್ಯಾಪ್‌ಟಾಪ್‌ ಚಾರ್ಜರ್‌ಗಳು, ಅಡಾಪ್ಟರ್‌ ಮತ್ತು ಕೇಬಲ್‌ಗಳ ತಯಾರಿಕೆಗೆ ಹೆಸರುವಾಸಿಯಾಗಿದೆ.