Karnataka Rains | ಧಾರಾಕಾರ ಮಳೆ: ನೂರಾರು ಎಕರೆ ಬೆಳೆ ಜಲಾವೃತ

ಹುಬ್ಬಳ್ಳಿ: ಧಾರವಾಡ, ವಿಜಯಪುರ, ವಿಜಯನಗರ, ಉತ್ತರ ಕನ್ನಡ ಸೇರಿ ವಿವಿಧ ಜಿಲ್ಲೆಗಳಲ್ಲಿ ಬುಧವಾರ ಉತ್ತಮ ಮಳೆಯಾಯಿತು.

ಉತ್ತರ ಕನ್ನಡ ಜಿಲ್ಲೆಯ ಕಾರವಾರ ಸೇರಿ ಕರಾವಳಿ ತಾಲ್ಲೂಕಿನಾದ್ಯಂತ, ಶಿರಸಿ ಸೇರಿ ಮಲೆನಾಡು ಭಾಗದಲ್ಲಿ ಗಾಳಿ ಸಹಿತ ಮಳೆ ಬೀಳುತ್ತಿದೆ. ಹೆಚ್ಚಿನ ಕಡೆ ತುಂತುರು ಮಳೆ ಇದೆ. 

ವಿಜಯನಗರ ಜಿಲ್ಲೆಯ ಹರಪನಹಳ್ಳಿ ತಾಲ್ಲೂಕಿನ ವಿವಿಧೆಡೆ ಸುರಿದ ಮಳೆಗೆ ನೂರಾರು ಎಕರೆ ಬೆಳೆ ಜಲಾವೃತಗೊಂಡಿದೆ. ಕೆಲ ಹಳ್ಳಿಗಳ ತಗ್ಗು ಪ್ರದೇಶದ ಮನೆಗಳಿಗೆ ನೀರು‌ ನುಗ್ಗಿದೆ.

ಜಿಟ್ಟಿನಕಟ್ಟೆಯಲ್ಲಿ ಮನೆಗೆ ನೀರು ನುಗ್ಗಿದೆ. ಕಂಭಟ್ರಹಳ್ಳಿ, ರಂಗಾಪುರ, ಗುಂಡಗತ್ತಿ, ತಲುವಾಗಲು, ಬೆಂಡಿಗೇರೆ, ಬೆಂಡಿಗೆರೆ ಸಣ್ಣತಾಂಡ, ಬಾಲೇನಹಳ್ಳಿ, ಕಂಚಿಕೆರೆ, ಸತ್ತೂರು, ಜಂಗಮ ತುಂಬಿಗೆರೆ ಸೇರಿ ವಿವಿಧೆಡೆ ನೂರಾರು ಎಕರೆ ಬೆಳೆ ಜಲಾವೃತವಾಗಿದೆ.