ಮೇಕೆದಾಟು: ಹೊಸ ಅಧ್ಯಯನಕ್ಕೆ ಕಾವೇರಿ ನೀರಾವರಿ ನಿಗಮ ತೀರ್ಮಾನ

ನವದೆಹಲಿ: ಮೇಕೆದಾಟು ಸಮತೋಲನ ಜಲಾಶಯ ಯೋಜನೆ ಕುರಿತು ಕೇಂದ್ರ ಜಲ ಆಯೋಗವು (ಸಿಡಬ್ಲ್ಯುಸಿ) ಕೆಲವೊಂದು ಅವಲೋಕನಗಳನ್ನು ಮಾಡಿರುವ ಹಿನ್ನೆಲೆಯಲ್ಲಿ ಹೊಸ ಅಧ್ಯಯನ ಹಾಗೂ ಸಮೀಕ್ಷೆ ನಡೆಸಲು ಕಾವೇರಿ ನೀರಾವರಿ ನಿಗಮವು ತೀರ್ಮಾನಿಸಿದೆ. 

ರಾಜ್ಯ ಸರ್ಕಾರ ಸಲ್ಲಿರುವ ವಿಸ್ತೃತ ಯೋಜನಾ ವರದಿಯ (ಡಿಪಿಆರ್‌) ಪರಿಶೀಲನೆ ನಡೆಸಿರುವ ಜಲ ಆಯೋಗವು ಭೂ ತಾಂತ್ರಿಕ ತನಿಖೆಗಳ ಕುರಿತು ಅವಲೋಕನಗಳನ್ನು ಮಾಡಿದೆ ಹಾಗೂ ಹೊಸ ಅಧ್ಯಯನಗಳನ್ನು ನಡೆಸುವಂತೆ ಈಚೆಗೆ ನಿರ್ದೇಶನ ನೀಡಿತ್ತು. 

ಈ ಯೋಜನೆಯಡಿ 67.16 ಟಿಎಂಸಿ ಅಡಿ ನೀರು ಸಂಗ್ರಹಿಸಲು ಸಮತೋಲನ ಜಲಾಶಯ ನಿರ್ಮಿಸಲಾಗುತ್ತದೆ. ಜತೆಗೆ, ಸೇತುವೆ, ಭೂಗತ ವಿದ್ಯುತ್‌ ಕೇಂದ್ರ ಹಾಗೂ ಸುರಂಗ ನಿರ್ಮಾಣ ಮಾಡಲಾಗುತ್ತದೆ. ಜಲಾಶಯದ ಮುಂಭಾಗದಲ್ಲಿ 4.75 ಟಿಎಂಸಿ ಅಡಿ ಕುಡಿಯುವ ನೀರು ಮೇಲೆತ್ತಲು ಜಾಕ್‌ವೆಲ್‌ ಕಮ್‌ ಪಂಪ್‌ಹೌಸ್‌ ನಿರ್ಮಾಣವನ್ನೂ ಒಳಗೊಂಡಿದೆ. ಯೋಜನೆಗೆ ನದಿ ಭಾಗದ 1,130 ಹೆಕ್ಟೇರ್ ಸೇರಿದಂತೆ 5,267 ಹೆಕ್ಟೇರ್ ಅರಣ್ಯ ಹಾಗೂ ಕಂದಾಯ ಭೂಮಿ ಬಳಕೆಯಾಗಲಿದೆ. ಜಲಾಶಯ ನಿರ್ಮಾಣದಿಂದಾಗಿ ಮಡಿವಾಳ, ಕೊಂಗೆದೊಡ್ಡಿ, ಸಂಗಮ, ಬೊಮ್ಮಸಂದ್ರ ಹಾಗೂ ಮುತ್ತತ್ತಿ ಗ್ರಾಮಗಳು ಮುಳುಗಡೆಯಾಗಲಿವೆ. 

3,946 ಹೆಕ್ಟೇರ್‌ನಲ್ಲಿ ಮರಗಳ ಎಣಿಕೆ:

 ಕಾವೇರಿ ವನ್ಯಜೀವಿ ಅಭಯಾರಣ್ಯವು ದಕ್ಷಿಣ ಭಾರತದ ಕುರುಚಲು ಕಾಡುಗಳು, ಬಿದಿರಿನ ಕಾಡುಗಳು ಮತ್ತು ನಿತ್ಯಹರಿದ್ವರ್ಣ ಶೋಲಾ ಸೇರಿದಂತೆ ಐದು ವಿಧದ ಕಾಡುಗಳನ್ನು ಒಳಗೊಂಡಿದೆ. ಯೋಜನಾ ಪ್ರದೇಶದ ಪ್ರತಿ ಹೆಕ್ಟೇರ್‌ನಲ್ಲಿ 300–400 ಮರಗಳು ಇರಬಹುದು ಎಂದು ಅಂದಾಜಿಸಲಾಗಿದೆ. ಪ್ರಮಾಣಿತ ಮಾದರಿ ವಿಧಾನಗಳನ್ನು ಅಳವಡಿಸಿಕೊಂಡು 3,946 ಹೆಕ್ಟೇರ್‌ನಲ್ಲಿ ಮರಗಳ ಎಣಿಕೆ ನಡೆಸಲಾಗುತ್ತದೆ. ಕಾಡುಪ್ರಾಣಿಗಳಿಗೆ ತೊಂದರೆಯಾಗದಂತೆ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡು ಅಧ್ಯಯನ ಹಾಗೂ ಸಮೀಕ್ಷೆ ನಡೆಸಲಾಗುವುದು ಎಂದು ಕಾವೇರಿ ನೀರಾವರಿ ನಿಗಮ ಸ್ಪಷ್ಟಪಡಿಸಿದೆ. 

• ಭೂತಾಂತ್ರಿಕ ಅಧ್ಯಯನ: *ಅರಣ್ಯ ತಿರುವು ಪ್ರಸ್ತಾವನೆಯ ಭಾಗವಾಗಿ ಕಲ್ಲಿನ ಕಂಬಗಳನ್ನು ಬಳಸಿಕೊಂಡು ಎಫ್‌ಆರ್‌ಎಲ್‌ ಗಡಿ ಗುರುತಿಸುವಿಕೆ

• ಅರಣ್ಯ ತಿರುವು ಪ್ರಸ್ತಾವನೆಯ ಭಾಗವಾಗಿ ಮರಗಳ ಎಣಿಕೆ

• ವನ್ಯಜೀವಿ ಸಂರಕ್ಷಣಾ ಯೋಜನೆಯ ಭಾಗವಾಗಿ ಜೀವವೈವಿಧ್ಯಗಳ ಮೇಲಾಗುವ ಪರಿಣಾಮಗಳ ಅಧ್ಯಯನ 

• ಪರಿಸರ ಪರಿಣಾಮದ ಅಧ್ಯಯನದ ಭಾಗವಾಗಿ ಮೂಲ ದತ್ತಾಂಶ ಸಂಗ್ರಹ

• ಆವಾಸಸ್ಥಾನ ನಾಶ: ಭೂತಾಂತ್ರಿಕ ಅಧ್ಯಯನದಿಂದಾಗಿ ದಟ್ಟವಾದ ಸಸ್ಯವರ್ಗ ನಾಶವಾಗಲಿದೆ. 

• ಜನರ ಓಡಾಟ, ಡ್ರಿಲ್ಲಿಂಗ್ ರಿಗ್‌ಗಳಿಂದ ಶಬ್ದ ಮತ್ತು ಕಂಪನ, ವಾಹನಗಳ ಸಂಚಾರದಿಂದಾಗಿ  ಕಾಡು
  ಪ್ರಾಣಿಗಳಿಗೆ ತೊಂದರೆಉಂಟಾಗಲಿದೆ. 

• ಕೊರೆಯುವ ಚಟುವಟಿಕೆಗಳಿಂದ ಮಣ್ಣಿನ ಸವೆತ ಹೆಚ್ಚಾಗಲಿದೆ. ಭಾರೀ ಮಳೆಯೊಂದಿಗೆ ಮಾಲಿನ್ಯಕಾರಕಗಳು ಜಲಚರ ಪರಿಸರ ವ್ಯವಸ್ಥೆಗಳಿಗೆ ಪ್ರವೇಶಿಸಲು ಕಾರಣವಾಗಬಹುದು.
  ಇದು ಸೂಕ್ಷ್ಮ ಪ್ರಭೇದಗಳ ಮೇಲೆ ಪರಿಣಾಮ ಬೀರುತ್ತದೆ.

• ವನ್ಯಜೀವಿ ಅಭಯಾರಣ್ಯಗಳ ಒಳಗೆ ಕಾಂಕ್ರೀಟ್ ಕಂಬಗಳ ಬಳಸುವುದರಿಂದ ಪ್ರಾಣಿಗಳ ಸುರಕ್ಷತೆ ಮತ್ತು ಆವಾಸಸ್ಥಾನದ ಸಮಗ್ರತೆಗೆ ದೀರ್ಘಕಾಲೀನ ಅಪಾಯಗಳನ್ನು ಒಡ್ಡುತ್ತದೆ.