ನಗರ ಸ್ಥಳೀಯ ಸಂಸ್ಥೆ: ಆಸ್ತಿ ತೆರಿಗೆ ರಿಯಾಯ್ತಿ ವಿಸ್ತರಣೆ

ಬೆಂಗಳೂರು: ಬಿಬಿಎಂಪಿ ಹೊರತು ಪಡಿಸಿ ರಾಜ್ಯದ ಇತರ ನಗರ ಸ್ಥಳೀಯ ಸಂಸ್ಥೆಗಳ ವ್ಯಾಪ್ತಿಯಲ್ಲಿ ಆಸ್ತಿ ತೆರಿಗೆ ಪಾವತಿಸುವವರಿಗೆ ಶೇಕಡ 5ರ ರಿಯಾಯ್ತಿಯನ್ನು ಆಗಸ್ಟ್‌ 31ರವರೆಗೂ ವಿಸ್ತರಿಸಿ ನಗರಾಭಿವೃದ್ಧಿ ಇಲಾಖೆ ಸೋಮವಾರ ಆದೇಶ ಹೊರಡಿಸಿದೆ.

ನಿಗದಿತ ಗಡುವಿನೊಳಗೆ ಆಸ್ತಿ ತೆರಿಗೆ ಪಾವತಿಸುವವರಿಗೆ ಶೇ 5ರ ರಿಯಾಯ್ತಿ ನೀಡಲಾಗುತ್ತಿದೆ. ಕೋವಿಡ್‌ ಲಾಕ್‌ ಡೌನ್‌ ಕಾರಣದಿಂದ 2021–22ನೇ ಸಾಲಿನಲ್ಲಿ ರಿಯಾಯ್ತಿ ಸೌಲಭ್ಯದ ಅವಧಿಯನ್ನು ಜುಲೈ 31ರವರೆಗೂ ವಿಸ್ತರಿಸಿ ಈ ಹಿಂದೆ ಆದೇಶ ಹೊರಡಿಸಲಾಗಿತ್ತು. ಆಗಸ್ಟ್‌ ತಿಂಗಳಿನಲ್ಲಿ ಆಸ್ತಿ ತೆರಿಗೆ ಪಾವತಿಸುವವರಿಗೂ ಶೇ 5ರ ರಿಯಾಯ್ತಿ ನೀಡಲು ಆದೇಶ ಹೊರಡಿಸಲಾಗಿದೆ.

ಜುಲೈ ಅಂತ್ಯದ ಬಳಿಕ ಆಸ್ತಿ ತೆರಿಗೆ ಪಾವತಿಸದೇ ಇರುವವರಿಗೆ ಒಟ್ಟು ಮೊತ್ತದ ಶೇ 2ರಷ್ಟು ದಂಡ ವಿಧಿಸಲು ಈ ಹಿಂದೆ ಆದೇಶ ಹೊರಡಿಸಲಾಗಿತ್ತು. ರಿಯಾಯ್ತಿಯ ಜತೆಯಲ್ಲೇ ದಂಡ ವಿಧಿಸುವುದನ್ನೂ ಮುಂದೂಡಲಾಗಿದೆ. ಸೆಪ್ಟೆಂಬರ್‌ 1ರಿಂದ ಅನ್ವಯಿಸುವಂತೆ ದಂಡ ವಸೂಲಿ ಮಾಡುವಂತೆ ಆದೇಶದಲ್ಲಿ ತಿಳಿಸಲಾಗಿದೆ.