ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೃದಯ ಕಲ್ಲಾಗಿದೆ: ದೇವನೂರ ಮಹಾದೇವ

ಮೈಸೂರು: ‘ಬಸವರಾಜ ಬೊಮ್ಮಾಯಿ ಅವರು ಹೃದಯವಂತರು, ಮೃದು ವ್ಯಕ್ತಿತ್ವವುಳ್ಳವರು. ಆದರೆ, ಮುಖ್ಯಮಂತ್ರಿ ಆದ ಮೇಲೆ ಅವರ ಹೃದಯ ಕಲ್ಲಿನಷ್ಟೇ ಕಠಿಣವಾಗಿದೆ’ ಎಂದು ಸಾಹಿತಿ ದೇವನೂರ ಮಹಾದೇವ ಟೀಕಿಸಿದರು.

‘ರಾಜ್ಯ ಸರ್ಕಾರ 3 ಕೃಷಿ ತಿದ್ದುಪಡಿ ಕಾನೂನುಗಳನ್ನು ಹಿಂಪಡೆಯಬೇಕು’ ಎಂದು ಆಗ್ರಹಿಸಿ ಜನಾಂದೋಲನ ಮಹಾಮೈತ್ರಿ ಹಮ್ಮಿಕೊಂಡಿರುವ ಜನಜಾಗೃತಿ ಜಾಥಾದಲ್ಲಿ ಅವರು ಭಾನುವಾರ ಮಾತನಾಡಿದರು.

‘ಬಸವರಾಜ ಬೊಮ್ಮಾಯಿ ಅವರಲ್ಲಿ ಆದ ಪರಿವರ್ತನೆ ಅತ್ಯಂತ ಕೆಟ್ಟದ್ದು. ಕೇಂದ್ರ ಕಾನೂನು ತಂದಂತೆ ಇಲ್ಲೂ ತಂದಿದ್ದಾರೆ. ಈ ಕಾನೂನುಗಳನ್ನು ತರಲು ₹ 50 ಸಾವಿರ ಕೋಟಿವರೆಗೆ ಅವ್ಯವಹಾರ ನಡೆದಿದೆ ಎಂಬ ಸುದ್ದಿ ಇದೆ. ಈ ಕುರಿತು ಸಿ.ಎಂ ಪರಿಶೀಲಿಸಬೇಕು. ಅವರಲ್ಲಿ ಮನುಷ್ಯತ್ವ ಇದ್ದರೆ ಈ ಕಾನೂನುಗಳನ್ನು ಈಗಲಾದರೂ ವಾಪಸು ತೆಗೆದುಕೊಳ್ಳಬೇಕು’ ಎಂದು ಒತ್ತಾಯಿಸಿದರು.

‘ಕೃಷಿ ಕಾನೂನುಗಳನ್ನು ವಾಪಸ್ ತೆಗೆದುಕೊಳ್ಳಲು ಆಗ್ರಹಿಸಿ ರೈತರು ನಡೆಸುತ್ತಿದ್ದ ಪ್ರತಿಭಟನೆಯಲ್ಲಿ ಹಲವರು ಮೃತರಾದಾಗ ಮೇಘಾಲಯ ರಾಜ್ಯಪಾಲರು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗಿ ಈ ಕುರಿತು ಗಮನಹರಿಸಲು ಕೋರಿದರು. ಆಗ ಮೋದಿ, ‘ಅವರು ನಮಗಾಗಿ ಸತ್ತರೇ’ ಎಂದು ಪ್ರಶ್ನಿಸಿದರು. ಇದು ನಿಜಕ್ಕೂ ನಿರ್ದಯ ಹಾಗೂ ಕಠೋರವಾದದು’ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

‘ತನ್ನ ಪ್ರಜೆಗಳನ್ನು ತನ್ನ ಮಕ್ಕಳು ಎಂದು ಹೇಳಿಕೊಳ್ಳಲಾಗದವರಿಗೆ ಈ ದೇಶದ ಪ್ರಧಾನಿಯಾಗಲು ಯೋಗ್ಯತೆ ಇದೆಯೇ’ ಎಂದು ಪ್ರಶ್ನಿಸಿದ ಅವರು, ‘ಅವರ ಹೃದಯದಲ್ಲಿ ಹೃದಯ ಇಲ್ಲ ಕೇವಲ ಕಲ್ಲಿದೆ ಅನಿಸುತ್ತೆ’ ಎಂದು ಬೇಸರ ವ್ಯಕ್ತಪಡಿಸಿದರು.

‘ರಾಜ್ಯದಲ್ಲೂ ಆಳ್ವಿಕೆ ಮಾಡುತ್ತಿರುವವರು ತಾವು ಮೋದಿ ತುಂಡು ಎಂದು ಭಾವಿಸಿ ಅವರಂತೆ ನಿರ್ದಯೆಯಿಂದ ನಡೆದುಕೊಳ್ಳುತ್ತಿದ್ದಾರೆ’ ಎಂದು ಹೇಳಿದರು.