ಭುಟ್ಟೊ ಹತ್ಯೆ: ಮುಷರಫ್ ಆರೋಪಿ

ಇಸ್ಲಾಮಾಬಾದ್(ಪಿಟಿಐ): ಪಾಕಿಸ್ತಾನದ ಮಾಜಿ ಪ್ರಧಾನಿ ಬೆನಜಿರ್ ಭುಟ್ಟೊ ಹತ್ಯೆ ಪ್ರಕರಣದ ಪ್ರಮುಖ ಆರೋಪಿಗಳ ಪಟ್ಟಿಯಲ್ಲಿ ಪಾಕ್ ಮಾಜಿ ಅಧ್ಯಕ್ಷ ಪರ್ವೇಜ್ ಮುಷರಫ್ ಅವರ ಹೆಸರು ಸೇರಿಸಲಾಗಿದೆ.

ರಾವಲ್ಪಿಂಡಿಯ ಭಯೋತ್ಪಾದನಾ ನಿಗ್ರಹ ನ್ಯಾಯಾಲಯದಲ್ಲಿ ತನಿಖಾಧಿಕಾರಿಗಳು ಮಂಗಳವಾರ ಮುಷರಫ್ ವಿರುದ್ಧ ನಾಲ್ಕು ಅಂಶಗಳನ್ನು ಒಳಗೊಂಡ ಆರೋಪಪಟ್ಟಿ ಸಲ್ಲಿಸಿದರು.

ಇದರಿಂದಾಗಿ ಈಗಾಗಲೇ ಹಲವು ಕಾನೂನು ಹೋರಾಟದಲ್ಲಿ ಸಿಲುಕಿಕೊಂಡಿರುವ ಮುಷರಫ್ (69) ಮತ್ತೊಂದು ಸಂಕಷ್ಟದಲ್ಲಿ ಸಿಲುಕಿಕೊಂಡಿದ್ದಾರೆ.

ಅಮೆರಿಕ ಪತ್ರಕರ್ತ ಮಾರ್ಕ್ ಸಿಗಲ್ ಸೇರಿದಂತೆ ನಾಲ್ಕು ಜನ ಸಾಕ್ಷಿಗಳ ಹೇಳಿಕೆ ಆಧರಿಸಿ ಈ ಆರೋಪ ಪಟ್ಟಿ ಸಿದ್ಧಪಡಿಸಲಾಗಿದೆ. ತಾವು  ಭುಟ್ಟೊ ಜತೆ ಕುಳಿತಿದ್ದಾಗಲೇ ಮುಷರಫ್ ಅವರಿಂದ ಬೆನಜೀರ್‌ಗೆ ಬೆದರಿಕೆ ಕರೆ ಬಂದಿತ್ತು ಎಂದು ಮಾರ್ಕ್ ಹೇಳಿಕೆ ನೀಡಿದ್ದಾರೆ.