ಯೆಮನ್‌ನಲ್ಲಿ ಕಾರ್‌ ಬಾಂಬ್ ಸ್ಫೋಟ: 8 ಬಲಿ

ಸನಾ (ಐಎಎನ್‌ಎಸ್‌):  ದಕ್ಷಿಣ ಯೆಮನ್‌ನ ಆ್ಯಡೆನ್‌ನಲ್ಲಿ ಭಾನುವಾರ ನಡೆದ ಕಾರ್‌ ಬಾಂಬ್‌ ಸ್ಫೋಟದಲ್ಲಿ ಕನಿಷ್ಠ 8 ಮಂದಿ ಬಲಿಯಾಗಿದ್ದಾರೆ ಎಂದು ಕ್ಷಿನುವಾ ಸುದ್ದಿಸಂಸ್ಥೆ ವರದಿ ಮಾಡಿದೆ.

ಸ್ಫೋಟಕಗಳನ್ನು ತುಂಬಿಕೊಂಡ  ಕಾರೊಂದನ್ನು ಆ್ಯಡೆನ್‌ನ ಭದ್ರತಾ ಮುಖ್ಯಸ್ಥ  ಬ್ರಿಗೇಡಿಯರ್‌ ಶಲಾಲ್‌ ಆಲಿ ಸಾಯಿದಾ ನಿವಾಸದ ಗೇಟಿನ ಬಳಿ ಸ್ಫೋಟಿಸಲಾಯಿತು. ಘಟನೆಯಲ್ಲಿ 8 ಮಂದಿ ಭದ್ರತಾ ಸಿಬ್ಬಂದಿ ಮೃತಪಟ್ಟಿದ್ದಾರೆ  ಎಂದು ಸ್ಥಳೀಯ ಪೊಲೀಸರು ಹೇಳಿದ್ದಾರೆ. 

ಸ್ಫೋಟದ ಬೆನ್ನಲ್ಲೇ ಭದ್ರತಾ ಸಿಬ್ಬಂದಿ ಮತ್ತು ದಾಳಿಕೋರರ ನಡುವೆ ಗುಂಡಿನ ಚಕಮಕಿ ನಡೆಯಿತು ಎಂದೂ ವರದಿ ಹೇಳಿದೆ.