ಸೊಮಾಲಿಯಾ: ಶಿಕ್ಷಕನಿಗೆ ಉಪಪ್ರಧಾನಿ ಪಟ್ಟ

ಲಂಡನ್ (ಐಎಎನ್‌ಎಸ್): ಉತ್ತರ ಲಂಡನ್‌ನ ಬ್ರೆಂಟ್ ಪ್ರದೇಶದ ನ್ಯೂಮನ್ ಕ್ಯಾಥೋಲಿಕ್ ಕಾಲೇಜಿನಲ್ಲಿ ಕಳೆದ ಎರಡು ವರ್ಷಗಳಿಂದ ಶಿಕ್ಷಕರಾಗಿ ಕೆಲಸ ನಿರ್ವಹಿಸುತ್ತಿದ್ದ ವ್ಯಕ್ತಿಯೊಬ್ಬರು ಈಗ ಸೊಮಾಲಿಯಾದ ಉಪ ಪ್ರಧಾನಿ ಪಟ್ಟವನ್ನು ಅಲಂಕರಿಸಿದ್ದಾರೆ. ಮಹಮ್ಮದ್ ಇಬ್ರಾಹಿಂ ಹೆಸರಿನ 64 ವರ್ಷದ ಈ ಶಿಕ್ಷಕರು ಬೇಸಿಗೆ ರಜೆಗೆಂದು ಸ್ವದೇಶಕ್ಕೆ ಹೋದವರು ಮರಳಿ ಕೆಲಸಕ್ಕೆ ಹಾಜರಾಗಿರಲಿಲ್ಲ.

ಈ ಬಗ್ಗೆ ಕಾಲೇಜಿನ ಮುಖ್ಯ ಶಿಕ್ಷಕ ರಿಚರ್ಡ್ ಕೋಲ್ಕಾ ಅವರು ಇಬ್ರಾಹಿಂ ಹೆಸರನ್ನು ಅಂತರ್ಜಾಲದ ಗೂಗಲ್ ತಾಣದಲ್ಲಿ ತಡಕಾಡಿದಾಗ ಅವರು ಸೊಮಾಲಿಯಾದ ಉಪ ಪ್ರಧಾನಿ ಪಟ್ಟಕ್ಕೆ ನಿಯೋಜಿತರಾಗಿರುವುದು ಸೊಮಾಲಿಯಾದ ಸರ್ಕಾರಿ ದಾಖಲೆಗಳಲ್ಲಿ ಕಂಡು ಬಂದಿತು ಎಂದು `ಡೈಲಿ ಮೇಲ್~ ವರದಿ ಮಾಡಿದೆ.