ಅಮೆರಿಕದಲ್ಲಿ ಕಾಳ್ಗಿಚ್ಚು: 400 ಕುಟುಂಬಗಳ ಸ್ಥಳಾಂತರ

ಸೌತ್‌ಡಕೋಟಾ: ಅಮೆರಿಕದ ಸೌತ್‌ ಡಕೋಟಾ ರಾಜ್ಯದ ಬ್ಲ್ಯಾಕ್‌ ಹಿಲ್ಸ್‌ ಪ್ರದೇಶದಲ್ಲಿ ಮೂರು ಕಡೆಗಳಲ್ಲಿ ಕಾಳ್ಗಿಚ್ಚು ಕಾಣಿಸಿಕೊಂಡಿದ್ದು, 400ಕ್ಕೂ ಅಧಿಕ ಕುಟುಂಬಗಳನ್ನು ಸ್ಥಳಾಂತರಿಸಲಾಗಿದೆ ಹಾಗೂ ಮೌಂಟ್‌ ರಶ್‌ಮೋರ್‌ ರಾಷ್ಟ್ರೀಯ ಸ್ಮಾರಕವನ್ನು ಮುಚ್ಚಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ರ‍್ಯಾಪಿಡ್ ಸಿಟಿಯ ವಾಯವ್ಯ ಭಾಗದಿಂದ 24 ಕಿ.ಮೀ ದೂರವಿರುವ ನೆಮೊ ಪ್ರದೇಶದ ಶೋಯಿಡೆರ್‌ ರಸ್ತೆಯ ಬಳಿ ಮೊದಲು ಬೆಂಕಿ ಕಾಣಿಸಿಕೊಂಡಿತು. ಆ ಬೆಂಕಿಯ ಕೆನ್ನಾಲಿಗೆ ಒಂದೂವರೆ ಮೈಲಿಗಳವರೆಗೆ ವ್ಯಾಪಿಸಿಕೊಂಡಿತು. ಸೋಮವಾರ ಮಧ್ಯಾಹ್ನದ ನಂತರವೂ ಬೆಂಕಿಯ ಕೆನ್ನಾಲಿಗೆ ವಿಸ್ತರಿಸುತ್ತಿರುವುದು ಮುಂದುವರಿಯಿತು ಎಂದುಪೆನ್ನಿಂಗ್‌ಟನ್‌ ಕೌಂಟಿಯ ಷರೀಫ್ಸ್‌ ಕಚೇರಿ ತಿಳಿಸಿದೆ.

‘ಈ ಬೆಂಕಿ ಅನಾಹುತದಲ್ಲಿ ಎರಡು ಮನೆಗಳು ನಾಶವಾಗಿರುವ ಸಾಧ್ಯತೆ ಇದೆ. ಕೆಲವು ಕಟ್ಟಡಗಳಿಗೆ ಹಾನಿ ಉಂಟಾಗಿದೆ. ಆದರೆ, ಯಾವುದೇ ಸಾವು ನೋವುಗಳು ಸಂಭವಿಸಿಲ್ಲ‘ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸುಮಾರು 250 ಅಗ್ನಿಶಾಮಕ ದಳ ಸಿಬ್ಬಂದಿ ಬೆಂಕಿ ನಂದಿಸಲು ಪ್ರಯತ್ನಿಸುತ್ತಿದ್ದರು. ಇದೇ ವೇಳೆಗೆ ಗಂಟೆಗೆ 50 ಕಿ.ಮೀ ನಿಂದ 70 ಕಿ.ಮೀ ವೇಗದಲ್ಲಿ ಬೀಸುತ್ತಿದ್ದ ಗಾಳಿಯಿಂದಾಗಿ ಬೆಂಕಿ ವ್ಯಾಪಕವಾಗಿ ಹರಡುವಂತಾಯಿತು ಎಂದು ‘ರ‍್ಯಾಪಿಡ್ ಸಿಟಿ ಜರ್ನಲ್’ ವರದಿ ಮಾಡಿದೆ.

ಇದೇ ವೇಳೆ ರ್‍ಯಾಪಿಡ್ ನಗರದ ನೈರುತ್ಯ ದಿಕ್ಕಿನಲ್ಲಿ ಇಂಥದ್ದೇ ಇನ್ನೆರಡು ಕಾಳ್ಗಿಚ್ಚು ಪ್ರಕರಣಗಳು ವರದಿಯಾಗಿದ್ದು, ಒಂದು ಭಾಗದಲ್ಲಿ ಸುಮಾರು 30.35 ಹೆಕ್ಟೇರ್ ಮತ್ತು ಇನ್ನೊಂದು ಭಾಗದಲ್ಲಿ 8.09 ಹೆಕ್ಟೇರ್ ಅರಣ್ಯ ಪ್ರದೇಶ ಬೆಂಕಿಗೆ ಆಹುತಿಯಾಗಿದೆ.