ಇರಾನ್‌ | ತೆಹ್ರಾನ್‌ ವೈದ್ಯಕೀಯ ಕೇಂದ್ರದಲ್ಲಿ ಅನಿಲ ಸ್ಫೋಟ; 19 ಮಂದಿ ಸಾವು
ತೆಹ್ರಾನ್‌: ಇರಾನ್‌ ರಾಜಧಾನಿ ತೆಹ್ರಾನ್‌ನ ಉತ್ತರ ಭಾಗದ ವೈದ್ಯಕೀಯ ಕ್ಲಿನಿಕ್‌ನಲ್ಲಿ ಅನಿಲ ಸೋರಿಕೆಯಿಂದ ಸ್ಫೋಟ ಸಂಭವಿಸಿ 19 ಜನ ಸಾವಿಗೀಡಾಗಿದ್ದಾರೆ. ಈ ಕುರಿತು ಇರಾನ್‌ನ ಟಿವಿ ಮಾಧ್ಯಮ ಮಂಗಳವಾರ ವರದಿ ಮಾಡಿದೆ.
ಅವಘಡದಲ್ಲಿ 13 ಮಂದಿ ಮೃತಪಟ್ಟಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದರು. ನಂತರದಲ್ಲಿ ತೆಹ್ರಾನ್‌ ಅಗ್ನಿಶಾಮಕ ಇಲಾಖೆಯ ವಕ್ತಾರ ಜಲಾಲ್‌ ಮಲೇಕಿ ಸಾವಿಗೀಡಾದವರ ಸಂಖ್ಯೆ 19ಕ್ಕೆ ಏರಿಕೆಯಾಗಿರುವುದಾಗಿ ತಿಳಿಸಿದ್ದಾರೆ.
ಮೃತರ ಪೈಕಿ 15 ಮಹಿಳೆಯರು ಹಾಗೂ ನಾಲ್ವರು ಪುರುಷರು. ಅಗ್ನಿಶಾಮಕ ಸಿಬ್ಬಂದಿ 20 ಜನರನ್ನು ರಕ್ಷಿಸಿದ್ದಾಗಿ ಮಲೇಕಿ ಹೇಳಿದ್ದಾರೆ.
ವೈದ್ಯಕೀಯ ಕೇಂದ್ರದಲ್ಲಿ ಆಕ್ಸಿಜನ್‌ ಸಂಗ್ರಹಿಸಿದ ಟ್ಯಾಂಕ್‌ಗಳಿದ್ದವು. ಅನಿಲ ಸೋರಿಕೆಯಿಂದ ಒಂದಕ್ಕಿಂತಲೂ ಹೆಚ್ಚು ಸ್ಫೋಟ ಸಂಭವಿಸಿರುವುದು ವಿಡಿಯೊಗಳಿಂದ ತಿಳಿದು ಬಂದಿದೆ. ಇದರಿಂದ ಕಟ್ಟಡದಲ್ಲಿ ಬೆಂಕಿ ವ್ಯಾಪಿಸಿರುವುದಾಗಿ ತೆಹ್ರಾನ್‌ನ ಉಪ ಗವರ್ನರ್‌ ಹಮಿದ್ರೆಝ ಗೌದರ್ಜಿ ತಿಳಿಸಿದ್ದಾರೆ.
ಸ್ಫೋಟದ ಸದ್ದು ಮತ್ತು ಬೆಂಕಿ ಹರಡುತ್ತಿರುವುದನ್ನು ಕಂಡು ತಜ್ರಿಷ್‌ ಬಜಾರ್‌ನಲ್ಲಿದ್ದ ಜನರು ರಕ್ಷಣಾ ಕಾರ್ಯಕ್ಕೆ ಇಳಿದರು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.