ಬೆಂಗಳೂರಿನ ಪ್ರೇಮಿಗಾಗಿ ಚಿನ್ನ ಮಾರಿ, ಸಾಲ ಪಡೆದಿದ್ದ ಪಾಕಿಸ್ತಾನದ ಇಕ್ರಾ

ಕರಾಚಿ : ಪ್ರೇಮಿಗಾಗಿ ನೇಪಾಳದ ಗಡಿ ಮೂಲಕ ಭಾರತದೊಳಗೆ ನುಸುಳಿದ್ದ 16 ವರ್ಷದ ಇಕ್ರಾ ಜೀವನಿ, ಅದಕ್ಕಾಗಿ ಸ್ನೇಹಿತರ ಬಳಿ ಸಾಲ ಪಡೆದಿದ್ದರು ಮತ್ತು ತಮ್ಮ ಬಳಿ ಇದ್ದ ಚಿನ್ನಾಭರಣವನ್ನು ಮಾರಿದ್ದರು ಎಂದು ಆಕೆಯ ಚಿಕ್ಕಪ್ಪ ತಿಳಿಸಿದ್ದಾರೆ.

ಬೆಂಗಳೂರಿನಲ್ಲಿ ಪ್ರೇಮಿ ಮುಲಾಯಂ ಸಿಂಗ್‌ ಜೊತೆ ಅಕ್ರಮವಾಗಿ ನೆಲೆಸಿದ್ದ ಆಕೆಯನ್ನು ಕಳೆದ ತಿಂಗಳು ಬಂಧಿಸಲಾಗಿತ್ತು. ಬಳಿಕ ಭಾನುವಾರ ಗಡಿಪಾರು ಮಾಡಿ ಪಾಕಿಸ್ತಾನ ಸೇನೆಯ ಸುಪರ್ದಿಗೆ ಒಪ್ಪಿಸಲಾಗಿತ್ತು.

‘ಇಕ್ರಾ ಅವರ ತಂದೆ, ತಾಯಿ ಮತ್ತು ಚಿಕ್ಕಪ್ಪ ಲಾಹೋರ್‌ಗೆ ಬಂದು ಆಕೆಯನ್ನು ಮನೆಗೆ ಕರೆದುಕೊಂಡು ಹೋಗಿದ್ದಾರೆ. ಮುಲಾಯಂ ಸಿಂಗ್‌ ತನ್ನ ಹೆಸರನ್ನು ಸಮೀರ್‌ ಅನ್ಸಾರಿ ಎಂದು ಪರಿಚಯ ಮಾಡಿಕೊಂಡಿದ್ದ. ಅಲ್ಲದೆ ತಾನು ಸಾಫ್ಟ್‌ವೇರ್‌ ಎಂಜಿನಿಯರ್ ಎಂದು ಇಕ್ರಾ ಬಳಿ ಹೇಳಿಕೊಂಡಿದ್ದ’ ಎಂದು ಕುಟುಂಬದ ಮೂಲಗಳು ತಿಳಿಸಿವೆ.

ಇಕ್ರಾ ಹಾಗೂ ಸೆಕ್ಯುರಿಟಿ ಗಾರ್ಡ್‌ ಆಗಿ ಕೆಲಸ ಮಾಡುತ್ತಿದ್ದ ಮುಲಾಯಂ ಸಿಂಗ್, ಲುಡೊ ಆ್ಯಪ್ ಮೂಲಕ ಪರಿಚಯವಾಗಿದ್ದರು. ಮುಲಾಯಂ ಸಿಂಗ್‌ ಅವರನ್ನು ಮದುವೆ ಆಗುವ ಉದ್ದೇಶದಿಂದ 2022ರಲ್ಲಿ ನೇಪಾಳದ ಗಡಿ ಮೂಲಕ ಇಕ್ರಾ ದೇಶದೊಳಗೆ ನುಸುಳಿದ್ದರು. ಮದುವೆಯಾಗಿರುವುದಾಗಿ ಹೇಳುತ್ತಿದ್ದ ದಂಪತಿ, ಕೆಲಸಕ್ಕಾಗಿ ಬೆಂಗಳೂರಿಗೆ ಬಂದು ಉಳಿದುಕೊಂಡಿದ್ದರು.