ಇರಾನ್‌ ಕಾರಾಗೃಹದಲ್ಲಿ ಅಗ್ನಿ ಅವಘಡ: ನಾಲ್ವರು ಕೈದಿಗಳ ಸಾವು

ಕೈರೊ: ರಾಜಕೀಯ ಕೈದಿಗಳು ಮತ್ತು ಸರ್ಕಾರ ವಿರೋಧಿ ಹೋರಾಟಗಾರರನ್ನು ಬಂಧಿಸಿಡಲಾದ ಟೆಹರಾನ್‌ನ ಇವಿನ್‌ ಕಾರಾಗೃಹದಲ್ಲಿ ಸಂಭವಿಸಿದ ಅಗ್ನಿ ಅವಘಡದಲ್ಲಿ ನಾಲ್ವರು ಕೈದಿಗಳು ಮೃತಪಟ್ಟು, 61 ಮಂದಿ ಗಾಯಗೊಂಡಿದ್ದಾರೆ ಎಂದು ದೇಶದ ನ್ಯಾಯಾಂಗ ಇಲಾಖೆ ಭಾನುವಾರ ತಿಳಿಸಿದೆ.

ಗಾಯಾಳುಗಳ ಪೈಕಿ ಹತ್ತು ಜನರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ನಾಲ್ವರ ಸ್ಥಿತಿ ಗಂಭೀರವಾಗಿದೆ ಎಂದು ಅದು ತಿಳಿಸಿದೆ.

ಪೊಲೀಸ್‌ ವಶದಲ್ಲಿದ್ದ ಯುವತಿ ಸಾವಿನ ನಂತರ ದೇಶದಲ್ಲಿ ನಡೆಯುತ್ತಿರುವ ಸರ್ಕಾರ ವಿರೋಧಿ ಪ್ರತಿಭಟನೆ ಐದನೇ ವಾರಕ್ಕೆ ಕಾಲಿಟ್ಟಿರುವಂತೆಯೇ ಜೈಲಿನಲ್ಲಿ ಅಗ್ನಿ ಆಕಸ್ಮಿಕ ಸಂಭವಿಸಿದೆ.