ಗಾಜಾದಲ್ಲಿ ಹಸಿವಿನಿಂದ ಸಾವು ಹೆಚ್ಚಳ: 3 ಕಡೆ ದಾಳಿಗೆ ತಾತ್ಕಾಲಿಕ ಬ್ರೇಕ್;ಇಸ್ರೇಲ್

ಟೆಲ್ ಅವಿವ್: ಹದಗೆಡುತ್ತಿರುವ ಮಾನವೀಯ ನೆರವಿನ ಪರಿಸ್ಥಿತಿಯನ್ನು ಪರಿಹರಿಸುವ ಕ್ರಮಗಳ ಭಾಗವಾಗಿ ಗಾಜಾದ ಮೂರು ಪ್ರದೇಶಗಳಲ್ಲಿ ದಾಳಿಗೆ ಯುದ್ಧತಂತ್ರದ ವಿರಾಮವನ್ನು ಪ್ರಾರಂಭಿಸುವುದಾಗಿ ಇಸ್ರೇಲ್ ಸೇನೆ ಭಾನುವಾರ ತಿಳಿಸಿದೆ.

ಭಾನುವಾರದಿಂದ ಪ್ರಾರಂಭವಾಗಿ ಮುಂದಿನ ಸೂಚನೆ ಬರುವವರೆಗೆ ಪ್ರತಿದಿನ ಸ್ಥಳೀಯ ಸಮಯ ಬೆಳಿಗ್ಗೆ 10:00 ರಿಂದ ರಾತ್ರಿ 8:00 ರವರೆಗೆ ಮುವಾಸಿ, ದೇರ್ ಅಲ್-ಬಲಾ ಮತ್ತು ಗಾಜಾ ನಗರದಲ್ಲಿ ಮಿಲಿಟರಿ ಚಟುವಟಿಕೆಯನ್ನು ಸ್ಥಗಿತಗೊಳಿಸುವುದಾಗಿ ಸೇನೆ ತಿಳಿಸಿದೆ.

ಗಾಜಾದಾದ್ಯಂತ ಜನರಿಗೆ ಆಹಾರ ಮತ್ತು ಇತರ ಸರಬರಾಜುಗಳನ್ನು ತಲುಪಿಸಲು ವಿಶ್ವಸಂಸ್ಥೆಯ ನೆರವು ಸಂಸ್ಥೆಗಳಿಗೆ ಸಹಾಯ ಮಾಡಲು ಸುರಕ್ಷಿತ ಮಾರ್ಗಗಳನ್ನು ಸಹ ಗೊತ್ತುಪಡಿಸುವುದಾಗಿ ಸೇನೆ ತಿಳಿಸಿದೆ.

ಇಂದು ರಾತ್ರಿ ಗಾಜಾದಲ್ಲಿ ವಾಯು ಮಾರ್ಗದ ಮೂಲಕ ಮಾನವೀಯ ನೆರವು ಕಾರ್ಯ ಆರಂಭವಾಗಲಿದೆ. ವಿಶ್ವಸಂಸ್ಥೆಯ ಏಜೆನ್ಸಿಗಳಿಗೆ ಮಾನವೀಯ ಕಾರಿಡಾರ್‌ಗಳನ್ನು ಸ್ಥಾಪಿಸಲಾಗುವುದು ಎಂದು ಹೇಳಿದೆ.

ಗಾಜಾದಲ್ಲಿ ಹಸಿವಿನಿಂದ ಸಾವಿಗೀಡಾಗುತ್ತಿರುವವರ ಸಂಖ್ಯೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇಸ್ರೇಲ್‌ನಿಂದ ಈ ಹೇಳಿಕೆ ಬಂದಿದೆ. ಇತ್ತೀಚೆಗೆ ನೆರವು ಪಡೆಯುತ್ತಿರುವಾಗಲೇ ಇಸ್ರೇಲ್ ದಾಳಿಗೆ ತುತ್ತಾಗಿ ನೂರಾರು ಪ್ಯಾಲೆಸ್ಟೀನಿಯನ್ನರು ಸಾವಿಗೀಡಾದ ಬಳಿಕ ಅಂತರರಾಷ್ಟ್ರೀಯ ವಲಯದಲ್ಲಿ ಭಾರಿ ಟೀಕೆ ವ್ಯಕ್ತವಾಗಿತ್ತು.

ಆದರೆ, ಹಮಾಸ್ ವಿರುದ್ಧ ಗಾಜಾದಲ್ಲಿ ಯುದ್ಧ ಕಾರ್ಯಾಚರಣೆಗಳು ನಿಂತಿಲ್ಲ ಎಂದು ಮಿಲಿಟರಿ ಒತ್ತಿ ಹೇಳಿದೆ.