ಇಟಲಿ ವ್ಯಕ್ತಿಗೆ ಒಟ್ಟೊಟ್ಟಿಗೆ ಕೋವಿಡ್, ಎಚ್‌ಐವಿ, ಮಂಕಿಪಾಕ್ಸ್ ಪಾಸಿಟಿವ್: ವರದಿ

ರೋಮ್: ಇಟಲಿಯ 35 ವರ್ಷ ವಯಸ್ಸಿನ ವ್ಯಕ್ತಿಯೊಬ್ಬರಲ್ಲಿ ಒಟ್ಟೊಟ್ಟಿಗೆ ಕೋವಿಡ್–19, ಎಚ್‌ಐವಿ ಹಾಗೂ ಮಂಕಿಪಾಕ್ಸ್ ದೃಢಪಟ್ಟಿದೆ ಎಂದು ಅಂತರರಾಷ್ಟ್ರೀಯ ಮಾಧ್ಯಮ ವರದಿ ಮಾಡಿದೆ.

ಒಬ್ಬ ವ್ಯಕ್ತಿಯಲ್ಲಿ ಒಟ್ಟೊಟ್ಟಿಗೆ ಕೋವಿಡ್–19, ಎಚ್‌ಐವಿ ಹಾಗೂ ಮಂಕಿಪಾಕ್ಸ್ ದೃಢಪಟ್ಟಿರುವುದು ಇದೇ ಮೊದಲು ಎಂದು ವಿಜ್ಞಾನಿಗಳು ಹೇಳಿರುವುದಾಗಿ ‘ಡೈಲಿ ಮೇಲ್’ ವರದಿ ಮಾಡಿದೆ.

ಸೋಂಕಿತ ವ್ಯಕ್ತಿಯಲ್ಲಿ ಆಯಾಸ, ಜ್ವರ, ಗಂಟಲು ಒಣಗುವಿಕೆ ಸೇರಿದಂತೆ ಹಲವು ಲಕ್ಷಣಗಳು ಕಾಣಿಸಿಕೊಂಡಿದ್ದವು. ಸ್ಪೇನ್ ಪ್ರವಾಸದಿಂದ ವಾಪಸಾದ 9 ದಿನಗಳ ಬಳಿಕ ಲಕ್ಷಣಗಳು ಕಾಣಿಸಿಕೊಂಡಿದ್ದವು.

ಗಡಿಯಲ್ಲಿ ಭಾರತ–ಅಮೆರಿಕ ನಡೆಸಲಿರುವ ಸಮರಾಭ್ಯಾಸಕ್ಕೆ ಚೀನಾ ವಿರೋಧ

ಸೋಂಕಿತ ವ್ಯಕ್ತಿ ಜೂನ್ 16ರಿಂದ 20ರ ವರೆಗೆ ಸ್ಪೇನ್‌ನಲ್ಲಿ ತಂಗಿದ್ದರು. ಅದೇ ವೇಳೆ, ಪುರುಷನೊಬ್ಬನ ಜತೆ ಅಸುರಕ್ಷಿತ ಲೈಂಗಿಕ ಕ್ರಿಯೆ ನಡೆಸಿದ್ದಾಗಿ ಹೇಳಿಕೊಂಡಿದ್ದಾರೆ. ಜುಲೈ 2ರಂದು ಅವರಿಗೆ ಕೋವಿಡ್ ದೃಢಪಟ್ಟಿತ್ತು ಎಂದು ವರದಿ ಉಲ್ಲೇಖಿಸಿದೆ.

ಅದೇ ದಿನ ಅವರ ಎಡ ಕೈಯಲ್ಲಿ ದದ್ದುಗಳು ಎದ್ದಿದ್ದವು. ಮರುದಿನ ಕೈ, ಕಾಲು ಹಾಗೂ ಮುಖಗಳ ಮೇಲೆ ಗುಳ್ಳೆಗಳು ಕಾಣಿಸಿಕೊಂಡವು. ಜುಲೈ 5ರಂದು ಅವರಿಗೆ ಮಂಕಿಪಾಕ್ಸ್ ತಗುಲಿರುವುದು ದೃಢಪಟ್ಟಿತು. ಬಳಿಕ ಅವರನ್ನು ಲೈಂಗಿಕವಾಗಿ ಹರಡುವ ಕಾಯಿಲೆಗಳ ಪರೀಕ್ಷೆಗೂ ಒಳಪಡಿಸಲಾಯಿತು. ವರದಿಯಲ್ಲಿ ಎಚ್‌ಐವಿ ಪಾಸಿಟಿವ್ ಬಂದಿತ್ತು ಎಂದು ವರದಿ ಉಲ್ಲೇಖಿಸಿದೆ.