ಜೈಶಂಕರ್‌–ಕ್ರಿಸ್ ರೈಟ್ ದ್ವಿಪಕ್ಷೀಯ ಮಾತುಕತೆ: ಇಂಧನ ಪೂರೈಕೆಯ ಕುರಿತು ಚರ್ಚೆ

ವಾಷಿಂಗ್ಟನ್‌: ವಿದೇಶಾಂಗ ವ್ಯವಹಾರ ಸಚಿವ ಎಸ್‌. ಜೈಶಂಕರ್‌ ಅವರು ಅಮೆರಿಕದ ಇಂಧನ ಕಾರ್ಯದರ್ಶಿ ಕ್ರಿಸ್ ರೈಟ್ ಅವರನ್ನು ಬುಧವಾರ ಭೇಟಿ ಮಾಡಿದ್ದಾರೆ.

‘ಉಭಯ ದೇಶಗಳ ಇಂಧನ ಪಾಲುದಾರಿಕೆ ಮತ್ತು ಭಾರತದೊಂದಿಗಿನ ಇಂಧನ ಪೂರೈಕೆಯ ಕುರಿತು ಚರ್ಚೆ ನಡೆಸಲಾಯಿತು’ ಎಂದು ಮಂಗಳವಾರ ಜೈಶಂಕರ್‌ ಅವರು ಸಾಮಾಜಿಕ ಜಾಲತಾಣ ‘ಎಕ್ಸ್‌’ನಲ್ಲಿ ತಿಳಿಸಿದ್ದಾರೆ.

ನ್ಯೂಯಾರ್ಕ್‌ ವರದಿ: ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್‌. ಜೈಶಂಕರ್‌ ಅವರು ಅಮೆರಿಕದ ವಿದೇಶಾಂಗ ಇಲಾಖೆ ಕಾರ್ಯದರ್ಶಿ ಮಾರ್ಕೊ ರುಬಿಯೊ ಅವರನ್ನು ಮಂಗಳವಾರ ಭೇಟಿಯಾಗಿದ್ದಾರೆ.

‘ಈ ಭೇಟಿಯಲ್ಲಿ ವ್ಯಾಪಾರ, ಭದ್ರತೆ, ಇಂಧನ, ಸಂಪರ್ಕ ಸೇರಿದಂತೆ ಭಾರತ ಮತ್ತು ಅಮೆರಿಕ ನಡುವಿನ ದ್ವಿಪಕ್ಷೀಯ ಪಾಲುದಾರಿಕೆಯ ಬಗ್ಗೆ ಚರ್ಚಿಸಲಾಯಿತು. ಸ್ಥಳೀಯ ಮತ್ತು ಜಾಗತಿಕ ಅಭಿವೃದ್ಧಿಯ ಕುರಿತು ಪರಸ್ಪರ ಮುನ್ನೋಟ ಹಂಚಿಕೊಳ್ಳಲಾಯಿತು’ ಎಂದು ಜೈಶಂಕರ್‌ ತಿಳಿಸಿದರು. 

ರಕ್ಷಣಾ ಕಾರ್ಯದರ್ಶಿ ಪೀಟ್‌ ಹೆಗ್ಸೆತ್‌ ಅವರನ್ನು ಕೂಡ ಜೈಶಂಕರ್‌ ಭೇಟಿಯಾಗಿದ್ದು, ಉಭಯ ದೇಶಗಳ ನಡುವೆ ರಕ್ಷಣಾ ಪಾಲುದಾರಿಕೆ ಮುಂದುವರಿಸುವ ಕುರಿತು ಚರ್ಚಿಸಲಾಗಿದೆ ಎಂದರು.

ರುಬಿಯೊ ಅವರ ಆಹ್ವಾನದ ಮೇರೆಗೆ ಜೂನ್‌ 30ರಿಂದ ಜುಲೈ 2ರವರೆಗೆ ಜೈಶಂಕರ್‌ ಅಮೆರಿಕದಲ್ಲಿ ಇರಲಿದ್ದಾರೆ.